Jańartylatyn energııa kózderine baılanysty esepteý-qarjy ortalyǵy qurylady
ASTANA. 8 mamyr. QazAqparat Jańartylatyn energııa kózderinen óndiriletin elektr qýatyn satyp alý úshin esepteý-qarjy ortalyǵy qurylatyn bolady.
Búgin QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine jańartylatyn energııa kózderin paıdalanýdy qoldaý máseleleri boıynsha ózgerister men tolyqtyrýlar engizý týraly» zań jobasy boıynsha baıandaǵan Qorshaǵan ortany qorǵaý mınıstri Nurlan Qapparov osylaı málim etti.
«Zań jobasy boıynsha esepteý-qarjy ortalyǵyn qurýǵa jumys tobynyń otyrysynda depýtattar bastama jasady. Buny Úkimet qoldady. Jalpy, jańartylatyn energııa kózderi stansalarynan óndiriletin elektr qýatyn satyp alýdy esepteý-qarjy ortalyǵy júzege asyratyn bolady», - dedi Nurlan Qapparov.
Mınıstrdiń aıtýynsha, zań jobasyna sáıkes, jańartylatyn energııa kózderin óndiretin uıymdar aldaǵy ýaqytta úsh júıeni tańdaıtyn bolady. Onyń biri esepteý-qarjy ortalyǵymen kelisimshart jasasý, ekinshisi turaqty tarıf negizindegi shemany tańdaý, al úshinshiden «Elektr energetıkasy týraly» zańnamaǵa sáıkes ekijaqty shart boıynsha bekitiletin tarıfte qalý. «Jańartylatyn energııa kózderinen elektr qýatyn óndiretin uıymdarmen bekitiletin úlgilik shart zańǵa táýeldi aktilermen belgilenetin bolady», - deıdi N. Qapparov.
