Jańartylatyn energııa kózderin damytýda júıeli jumys júrgizý kerek – Asqar Mamın
Bul týraly Úkimet otyrysynda Prmer-Mınıstr Asqar Mamın málim etti, dep habarlaıdy QazAqparat tilshisi.
«Eldiń ekologııalyq jaǵdaıyn jaqsartý – Memleket basshysy Qasym-Jomart Kemeluly Toqaev belgilegen basym mindetterdiń biri. Ekologııa men qorshaǵan ortany jaqsartý quraldarynyń biri jańartylatyn energııa kózderi bolyp sanalady. Ótken jyly jańartylatyn energııa kózderi jobalaryn iske asyrý boıynsha eleýli jumys atqaryldy. Byltyr qýaty 583 MVt bolatyn 25 nysan iske qosyldy», - dedi Úkimet basshysy.
Onyń aıtýynsha, búginde jańartylatyn energııa kózderi óndiretin energııa 3 paıyz nemese 3,24 mlrd kVt saǵatty quraıdy, 2019 jylmen salystyrǵanda 74 paıyzǵa ósti.
«Álemdik sarapshylardyń boljamy boıynsha 2025 jylǵa qaraı jańartylatyn energııa kózderi álemdegi elektr energııasynyń iri óndirýshisine aınalady. Aıtalyq, Eýropalyq Odaqta 2020 jyly jańartylatyn energııa kózderiniń elektr energııasyn óndirý dástúrli óndirýge qaraǵanda 1 paıyz artyq bolǵan. Qazaqstanda «jasyl ekonomıkaǵa» kóshý tujyrymdamasy qabyldanyp, iske asyrylyp jatyr, ol boıynsha 2050 jyly elektr energııasynyń jartysyn balama energetıka óndiretin bolady», - dedi A. Mamın.
Jańartylatyn energııa kózderin damytýdyń mundaı qarqyny - tómen kómirtekti jáne klımattyq ornyqty damý jónindegi Parıj kelisimi boıynsha mindettemelerdi saqtaýymyzǵa jáne Qazaqstannyń «jasyl» energetıkalyq damý aıasynda bolýyna múmkindik beredi.
«Sondyqtan jańartylatyn energııa kózderin damytý boıynsha Energetıka mınıstrligi atqaryp jatqan barlyq is-sharalardy qoldaımyz. Bizdiń mindetimiz – osy salany damytý boıynsha júıeli jumys júrgizý», - dedi Premer-Mınıstr.
