Jańartylǵan WBA reıtıngindegi qazaqstandyq boksshylardyń orny belgili boldy

Dúnıejúzilik boks qaýymdastyǵy (WBA) barlyq salmaq dárejesi boıynsha reıtınginiń jańartylǵan nusqasyn jarııalady. Kazinform bul týraly Sports.kz-ke silteme jasap habarlaıdy. 

Asa aýyr salmaqta Ivan Dychko bir saty tómendep, 11-orynǵa syrǵydy. Reıtınginiń basyna Deonteı Ýaılder jaıǵassa, ekinshi qatarda Kongo DR ókili Martın Bakole, úshinshi orynda ulybrıtanııalyq Entonı Djoshýa tur. Bul salmaqtaǵy álemniń «sýperchempıony» - ýkraınalyq boksshy Aleksandr Ýsık.

Ekinshi orta salmaqta Bek Nurmaǵanbet bir saty joǵarylap, onnan toǵyzynshy orynǵa kóterildi. Úzdik úshtikti frantsııalyq Krıstıan Mbıllı, kanadalyq Erık Bazınıan men ırlandııalyq Patrık Makrorı túıindep tur. Osy salmaqtaǵy álemniń absolıýtti chempıony – meksıkalyq Saýl «Kanelo» Alvares.

Birinshi jartylaı orta dıvızıonda Batyr Júkembaev 14-ornyn saqtap qaldy. Bul salmaq boıynsha WBA-nyń álem chempıony ataǵy ázirge bos. Úzdik úsh úmitker retinde ulybrıtanııalyq Ohara Devıs, AQSh boksshysy kishi Kennet Sıms pen venesýelalyq Ismael Barroso usynyldy. 

Ekinshi jartylaı jeńil salmaqta judyryqtasatyn Sultan Zaýrbek bir orynǵa tómen syrǵyp, altynshy oryndy mise tutty. Kóshtiń basyn amerıkalyq boksshy kishi Lamont Roých eshkimge berer emes. Odan keıingi oryndarǵa grýzııalyq Otar Eranosıan men ırlandııalyq Djono Kerroll ornalasqan. 

Ekinshi jeńil salmaqta Evgenıı Pavlov úzdik tórttikti túıindep tur. Ózbekstandyq Mýrodjon Ahmadalıev birinshi, meksıkalyq Kevın Gonsales ekinshi, ýkraınalyq Oleg Dovgýn úshinshi oryndy ózara bólisken. Bul salmaqta WBA kategorııasy boıynsha álem chempıony – fılıppındik Marlon Tapales.