Jańartylatyn Konstıtýtsııanyń memlekettik tildegi mátinin kimder daıyndady
ASTANA. KAZINFORM – Konstıtýtsııalyq reforma jónindegi komıssııanyń kezekti otyrysynda Konstıtýtsııalyq sot tóraǵasynyń orynbasary Baqyt Nurmuhanov Ata zańnyń memlekettik tildegi mátinin jazýǵa kimder tartylǵanyn aıtty.
– Jınaqtalǵan jobany jasaǵan kezde konstıtýtsııalyq normalardaǵy termınologııalyq birizdilikke jáne quqyqtyq aıqyndylyqqa erekshe nazar aýdaryldy. Joǵary bilikti quqyqtanýshylar men lıngvıstıka mamandarynan turatyn toptar qazaq jáne orys tilindegi mátinder boıynsha jumys istep jatyr. Olar Konstıtýtsııa erejelerin durys jazý, maǵynalyq sáıkessizdikterdi ár túrli paıymdaýdy jáne túsiniksizdikterdi boldyrmaý úshin qyrýar sharýa tyndyrdy. Komıssııada qaralǵan usynystardy zań túrinde rásimdeýge jáne jobanyń memlekettik tildegi mátinin daıyndaýǵa memlekettik organdardyń qyzmetkerleri men tanymal ǵalymdar tartyldy, - dedi ol.
Baqyt Nurmuhanov bul iske tartylǵan mamandar stılıstıkalyq jáne termınologııalyq kemshilikterdi boldyrmaýǵa bar kúsh-jigerin salǵanyn jetkizdi.
– Konstıtýtsııa normalaryn jazýdyń jańa stıli, maǵynalyq qatelikterdi joıý, Ata zańdy durys túsinýge qyzmet etedi jáne yqtımal aýytqýlardyń aldyn alady. Jobada Konstıtýtsııalyq komıssııanyń ótken otyrystarynda jáne jumys toptarynda aıtylǵan usynystar men bildirilgen pikirler eskerildi, - dedi Konstıtýtsııalyq sot tóraǵasynyń orynbasary.
Jalpy Konstıtýtsııalyq komıssııa otyrysynda partııalar qandaı usynys aıtqanyn myna silteme arqyly oqýǵa bolady.