Jańartylatyn energııa: Qazaqstan men Qytaı 30 jobany júzege asyryp jatyr

ASTANA. KAZINFORM — Búgin elordada «Ortalyq Azııa — Qytaı: Energetıka» forýmynda QR Energetıka mınıstri Erlan Aqkenjenov saladaǵy jobalar týraly aıtty.

Onyń aıtýynsha, energetıka salasy — dástúrli túrde Qazaqstan-Qytaı seriktestiginiń ózegi. Eki el qarym-qatynasy qazir birlesken ári tehnologııalyq turǵydan baı ekojúıege baǵyt aldy.

— Qazirgi kezde Qytaı kompanııalarynyń qatysýymen jańartylatyn energııa boıynsha 30 joba júzege asyrylyp jatyr, jalpy qýattylyǵy — 1700 MVt, — dedi Erlan Aqkenjenov.

Onyń sózine qaraǵanda, búgin CNPC kompanııasymen negizgi qujattarǵa saltanatty túrde qol qoıyldy. Sonyń ishinde:

— Shymkent munaı óńdeý zaýytyn 12 mln tonnaǵa deıin keńeıtý týraly negizdemelik kelisim. Nátıjesinde elimizdiń shıkizat óńdeý, munaı ónimderin eksporttaý áleýeti artady;

— Aqtóbe oblysynda karbamıd óndiretin zaýytty iske qosýǵa arnalǵan kelisim;

— Úshjaqty málimdeme: Qazaqstan Respýblıkasy Energetıka mınıstrliginiń «QazaqGaz» AQ jáne CNPC-men «Severnyı-1» jobasy jáne kómirsýtegi salasyndaǵy yntymaqtastyqty damytý boıynsha.

Sondaı-aq Qazaqstan-Qytaı munaı qubyrlaryn (Atyraý-Keńqııaq, Keńqııaq-Qumkól) keńeıtý jumystary júrgizilip jatyr.

— Búgingi forým ózara áriptestigimizdiń jańa paraǵyn ashyp, energetıka, ónerkásip, ǵylym jáne bilim berý salalaryndaǵy tereń yntymaqtastyqqa negiz bolatyn mańyzdy alańǵa aınalyp otyr, — dedi mınıstr.

Budan buryn habarlanǵandaı, sonymen qatar elordada «Ortalyq Azııa — Qytaı» ekinshi ındýstrııalyq-ınvestıtsııalyq yntymaqtastyq forýmy ótip jatyr.