Janartaýdyń atqylaý qaýpinen Islandııada tótenshe jaǵdaı jarııalandy

Islandııada qatarynan bolǵan birneshe jerasty dúmpýinen keıin Fagradalsfıadl janartaýynyń atqylaý yqtımaldyǵy kúrt artty. Kazinform bul týraly VVS-ge silteme jasap habarlaıdy.

Jergilikti bılik janartaýdan 8 shaqyrym qashyqtyqta ornalasqan Grındavık qalasynyń turǵyndaryn saqtyq sharasy retinde úılerin tastap ketýge shaqyrdy.

Elde tótenshe jaǵdaı rejımi jarııalandy.

Sońǵy aptada Fagradalsfıadl janartaýy ornalasqan aımaqta myńdaǵan jerasty dúmpýi tirkeldi.

Janartaýdyń janynda Keblavık halyqaralyq áýejaıy ornalasqan.

Islandııanyń meteorologııa basqarmasy (IMO) Reıkıanes túbeginde kez kelgen sátte janartaýdyń oıaný qaýpi týraly eskertti.

Islandııa ýnıversıtetiniń výlkanologııa professory Tor Tordarson magma qazirgi ýaqytta janartaý betinen 800 metrdeı ǵana tereńdikte ornalasqanyn jáne onyń syrtqa tógilýi aqıqat ekenin jetkizdi.

«Ókinishke qaraı, áńgime janartaýdyń taıaý ýaqytta atqylaı bastaıtynynda bolyp otyr. Aýmaǵy – Grındavık qalasynyń aınalasy», – dedi ol Bı-bı-sı-ge.