Janarmaı tapshylyǵy: Halyqaralyq áýe kóligi qaýymdastyǵy reısterdiń toqtatylýy múmkin ekenin eskertti
ASTANA. KAZINFORM - Iranmen soǵys saldarynan avıatsııalyq janarmaı tapshylyǵy týyndaýyna baılanysty, Eýropada mamyr aıynyń sońynan bastap reıster toqtatylýy múmkin. Bul týraly Halyqaralyq áýe kóligi qaýymdastyǵynyń (IATA) bas dırektory Ýıllı Ýolsh málimdedi, dep jazady BILD.
Onyń aıtýynsha, balama jetkizý baǵyttaryn qamtamasyz etýmen qatar, bılik shekteýler engizilgen jaǵdaıda naqty ári úılestirilgen jospar ázirleýi tıis. Bul josparǵa ushý jáne qoný quqyqtaryna qatysty jeńildikter de kiredi.
Eýropalyq áýe kompanııalary aldaǵy aptalarda janarmaı tapshylyǵy týyndaýy múmkin ekenin buǵan deıin de eskertken bolatyn.
Eýropa avıatsııalyq janarmaı ımportyna erekshe táýeldi. Sebebi onyń shamamen 75 paıyzy Taıaý Shyǵystan keledi.
Halyqaralyq energetıka agenttiginiń málimetinshe, 2025 jyly álemde avıatsııalyq janarmaıǵa degen suranys táýligine orta eseppen 7,8 mıllıon barreldi quraǵan. Al Parsy shyǵanaǵy óńiri kúnine shamamen 400 myń barrel jetkizip, álemdik naryqtaǵy eń iri jetkizýshilerdiń biri bolyp otyr.
Osyǵan deıin Taıaý Shyǵystaǵy jaǵdaıǵa baılanysty Azııa áýe kompanııalary reısterin qysqartyp jatqany týraly jazǵan edik.
