Janarmaı tapshy: Mońǵolııada benzın kólik nómirine qaraı satyla bastady
ASTANA. KAZINFORM — Mońǵolııa bıligi benzın satýǵa ýaqytsha shekteý engizdi. Tamyz aıynyń ortasyna deıin janarmaı avtokóliktiń memlekettik nómiriniń jup nemese taq bolýyna qaraı satylady. Sonymen qatar bir ret satyp alýǵa bolatyn eń joǵary soma 50 myń týgrıkpen (shamamen 14 dollar) shekteldi, dep habarlaıdy Montsame.
Shekteýler 4 tamyz kúni túngi saǵat 00:00–den bastap kúshine endi jáne 15 tamyzǵa deıin jalǵasady. Endi júrgizýshiler benzındi kóliginiń memlekettik nómiriniń jup nemese taq bolýyna qaraı ǵana satyp ala alady. Sondaı-aq janarmaı quıý beketterinde benzındi ydystarǵa quıýǵa tyıym salyndy.
Úkimet mundaı sharalar qoldaǵy janarmaı qoryn tıimdi bólýge, janarmaı quıý beketterindegi kezekti azaıtýǵa jáne aýyldyq jerlerdi úzdiksiz otynmen qamtamasyz etýge múmkindik beredi dep esepteıdi.
Ónerkásip jáne mıneraldyq resýrstar mınıstri Gongorın Damdınıam janarmaı tapshylyǵyn munaı men munaı ónimderin jetkizýdegi jahandyq logıstıkalyq irkilistermen jáne halyqaralyq energetıkalyq daǵdaryspen baılanystyrdy.
Qordy tolyqtyrý úshin Mońǵolııa qosymsha jetkizý kózderin izdeýge kiristi. Sonymen qatar el bıligi Reseımen munaı ónimderiniń eksportyn ulǵaıtý máselesin talqylap, Ońtústik Koreıa úkimetimen jáne jergilikti munaı óńdeý kásiporyndarymen jańa jetkizilimder boıynsha kelissóz júrgizip jatyr.
Aıta keteıik, Ulybrıtanııada benzın qymbattaǵan soń janarmaı urlyǵy jıilep ketti.
