Janarmaı stansasyn tonaǵan aqmolalyq eks-polıtseı 5 jylǵa sottaldy
KÓKShETAÝ. QazAqparat - Aqmola oblysynda janar-jaǵar maı quıý stansasyna qaraqshylyq shabýyl jasaǵan burynǵy polıtsııa qyzmetkerine sot úkimi shyqty, dep habarlaıdy QazAqparat tilshisi Shortandy aýdandyq sotyna silteme jasap.
Sotta belgili bolǵandaı, qylmys 2018 jyldyń 5 qazanynda saǵat 04:00-de, aldyn ala daıyndalǵan jospar boıynsha júzege asqan. Osy qylmysqa kúdikti bolǵan Shortandy aýdanynyń ІІB Ýaqytsha ustaý ızolıatorynyń burynǵy basshysy 39 jastaǵy polıtsııa qyzmetkeri betperde, bir ret kıetin qolǵap, kúrte kıip, oq salatyn eki magazıni bar «Vepr-223» ańshy myltyǵymen «Astana-Kókshetaý» tasjolynyń boıynda ornalasqan Shortandy kentinen 1 shaqyrym qashyqtyqtaǵy «QazMunaıGaz» janar-jaǵar maı quıý stansasyn tonaǵan.
Qylmys kezinde ol janarmaı quıý stansasynyń kassırin qorqytyp, bar aqshany jınap alyp, oqıǵa ornynan taıyp turǵan. Budan stansasynyń ıesine 1 184 230 teńge kóleminde materıaldyq shyǵyn kelgen.
Іsti qaraý kezinde protsessýaldyq prokýror men sottalýshynyń arasynda qylmysty moıyndaý týraly kelisim jasaldy. Sottalýshy óz erkimen materıaldyq jáne moraldyq shyǵynnyń ornyn toltyrdy.
Osyǵan baılanysty sot Shortandy aýdanynyń ІІB Ýaqytsha ustaý ızolıatorynyń 39 jastaǵy burynǵy basshysyn QR QK 192-babynyń 2-tarmaǵy, 3-tarmaqshasy boıynsha jasaǵan qylmysy úshin aıypty dep sanap, 5 jylǵa bas bostandyǵynan aıyrý úkimin kesti.
