17 janarmaı quıý stantsııasynan benzın synamalary alyndy
ASTANA. KAZINFORM – Saýda jáne ıntegratsııa mınıstrligi azamattardan kelip túsken ótinishterge baılanysty avtomobıl benzıniniń sapasyna zerthanalyq zertteýdi jalǵastyryp jatyr.
QR SIM Tehnıkalyq retteý jáne metrologııa komıtetiniń Pavlodar oblysy boıynsha aýmaqtyq departamenti Pavlodar munaı-hımııa zaýytynda tikeleı alynǵan benzınniń arbıtrajdyq synamalaryn óndirýshiden táýelsiz zerthanaǵa tapsyrdy. Sinoil, QazaqOil jáne Helios qospalary qosylǵan otyn úlgileri de jeke zerttelýde. Zertteý nátıjeleri bir apta ishinde belgili bolady.
— Qazirgi ýaqytta azamattardyń 12 ótinishi qaralyp jatyr: 9-y — Astana qalasynan, 1-eýi — Pavlodardan jáne 2-eýi — Soltústik Qazaqstan oblysynan.
Sonymen qatar, 17 janarmaı quıý stantsııasynda baqylaý satyp alýy júrgizildi: 5-eýi — Almaty qalasynda, 5-eýi — Almaty oblysynda, 6-aýy — Abaı oblysynda jáne 1-eýi — Jambyl oblysynda. Qazirgi ýaqytta alynǵan úlgilerge zerthanalyq synaq júrgizilip jatyr, — delingen mınıstrlik habarlamasynda.
Osylaısha, júrgizilip jatqan tekserý otyn sapasyn óndiris kezeńinde ǵana emes, ony tutynýshyǵa satýǵa deıingi keıingi aınalym kezeńderinde de baǵalaýǵa múmkindik beredi.
Tekserý aıasynda synamalar búkil jetkizý tizbegi boıynsha, onyń ishinde munaı bazalarynda da alynady. Bul jumystardy júrgizý úshin qajetti normatıvtik-tehnıkalyq qujattar, memlekettik standarttar jáne synaq zerthanalary bar.
— Avtomobıl benzıniniń tehnıkalyq reglament talaptaryna sáıkes kelmeıtini anyqtalǵan jaǵdaıda, zańnamada kózdelgen sharalar qabyldanady. Onyń ishinde talaptarǵa sáıkes kelmeıtin janar-jaǵarmaı materıaldaryn satýǵa tyıym salý jáne aınalymnan alyp qoıý sharalary qarastyrylǵan, — delingen habarlamada.
Saýda jáne ıntegratsııa mınıstrligi júrgizilip jatqan zertteýlerdiń nátıjeleri týraly habardar etip otyrady.
Aıta ketelik Pavlodarda óndiriletin AI-95 jáne AI-98 markaly benzınderi talapqa saı ekendigi týraly jazǵan edik.
