Janarmaı daǵdarysy: áýe kompanııalarynda bılet qymbattap, reıster qysqaryp jatyr
ASTANA. KAZINFORM – Álemdik áýe tasymaldaýshylary Iran tóńiregindegi qaqtyǵys aıasynda avıaotyn baǵasynyń kúrt ósýinen zardap shege bastady. Bul jaǵdaı áýe bıletteriniń qymbattaýyna, baǵyttardyń qysqarýyna jáne reıster kestesiniń buzylýyna ákelip jatyr. Bul týraly Reuters agenttigi jazdy.
17 naýryzda álemniń iri áýe kompanııalary AQSh, Izraıl jáne Iran arasyndaǵy áskerı qaqtyǵys saldarynan avıaotyn baǵasynyń ósýine baılanysty shyǵyndardyń aıtarlyqtaı artqanyn málimdedi. Tasymaldaýshylar tarıfterdi kóterý jáne marshrýttyq jelini ońtaılandyrý qajettigin eskertti.
Delta Air Lines bas dırektory Ed Bastıan naýryz aıynyń ózinde kompanııanyń qosymsha janarmaı shyǵyndary 400 mln dollarǵa jetýi múmkin ekenin aıtty. Onyń sózinshe, sala ókilderi shyǵyndardyń bir bóligin jolaýshylarǵa bılet baǵasyn kóterý arqyly júkteı bastaǵan.
Osyndaı úrdis American Airlines kompanııasynda da baıqalady. Onda birinshi toqsanda shyǵyndar shamamen 400 mln dollarǵa artady dep boljanyp otyr.
Eýropalyq áýe tasymaldaýshylary da jaǵdaıǵa jedel áreket ete bastady. Skandınavııalyq SAS avıakompanııasy otynnyń «kúrt ári kútpegen» qymbattaýyna baılanysty reısterdiń bir bóligin qysqartatynyn jarııalady. Kompanııa Eýropanyń búkil avıatsııalyq júıesi aıtarlyqtaı qysymǵa ushyrap otyrǵanyn atap ótti.
Áskerı qaqtyǵys jahandyq avıatsııa jumysyna eleýli áser etti. Taıaý Shyǵysta zymyran jáne dron shabýyldary qaýpine baılanysty áýe keńistiginiń edáýir bóligi jabylyp, jappaı reıster toqtatyoyp, ushaqtar keshigip, keıbir baǵyttar ózgertildi.
Iranǵa jasalǵan soqqylar bastalǵaly beri Eýropada avıaotyn baǵasy eki esege, al Azııada shamamen 80%-ǵa ósken. Avıaotyn áýe kompanııalary shyǵyndarynyń eń iri baptarynyń biri bolyp qala beredi jáne operatsııalyq shyǵyndardyń tórtten birine deıin jetedi.
Osy jaǵdaı aıasynda birqatar elder áýe tasymalynyń qysqarý qaýpi týraly eskertip otyr. Máselen, Vetnam bıligi Qytaı men Taıland tarapynan otyn eksportynyń toqtatylýyna baılanysty sáýir aıynan bastap reıster sanynyń azaıýy múmkin ekenin málimdedi. Al Birikken Arab Ámirlikteri aýmaǵynda qaýipke baılanysty áýe keńistigi ýaqytsha jabylyp, drondarǵa qatysty oqıǵalar Dýbaı áýejaıy jumysyna áser etti.
Eýropada da janarmaı daǵdarysynyń saldary sezilýde: Frankfýrt áýejaıynda qaqtyǵystyń alǵashqy eki aptasynda reısterdiń toqtatylýy shamamen 86 myń jolaýshyǵa áser etken, al hab pen Taıaý Shyǵys arasyndaǵy reıster sany ádettegi deńgeıdiń úshten birine deıin qysqarǵan.
Sarapshylardyń pikirinshe, qazirgi jaǵdaı avıatsııa salasy úshin COVID-19 pandemııasynan bergi eń iri syn-qaterlerdiń birine aınalyp otyr.
Buǵan deıin Qazaqstan Úkimeti avıaotyn baǵasyn tómendetý boıynsha sharalar qabyldaǵany habarlanǵan. Osyǵan baılanysty qazaqstandyqtar úshin áýe bıletteriniń arzandaýy múmkin be degen suraqqa Kólik mınıstrligi jaýap bergen.
Sonymen qatar Naýryz meıramy kezeńinde Qazaqstanda qosymsha áýe reısterin iske qosý josparlanyp otyr.
