Janarmaı beketterinde benzın baǵasy nege árkelki — mınıstr sebebin atady
ASTANA. KAZINFORM — Benzın men dızel otyny baǵasynyń kúrt ósýine esh negiz joq. Bul týraly búgin Úkimet otyrysynan keıingi baspasóz máslıhatynda Energetıka mınıstri Erlan Aqkenjenov aıtty.
— Birinshiden, Qazaqstanda janar-jaǵarmaı baǵasy ishki suranys pen ishki usynysqa baılanysty qalyptasatynyn atap ótkim keledi. Qazirgi ýaqytta memleket burynǵydaı kóterme jáne bólshek saýdadaǵy baǵany rettemeıdi. Qatelespesem, bul tájirıbeden 2024 jylǵy aqpanda bas tarttyq. Sodan beri búgingi kúnge deıin baǵa naryqtyq tetik negizinde qalyptasyp keledi. Shynymdy aıtsam, baǵaǵa qatysty boljam jasaý ońaı emes. Degenmen qazirgi ýaqytta elimizdegi benzın men dızel otyny baǵasynyń aralyǵyn aıta alamyn. Odan keıin ózderińiz qorytyndy jasaı jatarsyzdar, — dedi mınıstr BAQ ókilderiniń saýalyna oraı.
Onyń dereginshe, AI-92 markaly benzınniń baǵasy 253-271 teńge aralyǵynda, al dızel otyny 356-367 teńge aralyǵynda satylyp jatyr.
— Kórip otyrǵandaryńyzdaı, janarmaı quıý beketterindegi baǵa aıyrmashylyǵy aıtarlyqtaı. Munyń sebebi — keıbir janarmaı quıý beketteriniń ónimdi ótkizýge jumsaıtyn shyǵyndary ózgelerge qaraǵanda tómen bolýy múmkin. Sondyqtan bir bekette baǵa tómen bolsa, ekinshisinde joǵary. Bul elimizde naryqtyq jaǵdaı men básekelestik bar ekenin kórsetedi, ıaǵnı baǵa ishki suranys pen ishki usynys negizinde qalyptasady, — dedi Erlan Aqkenjenov.
Mınıstr benzın men dızel otynynyń baǵasy kúrt ósýi baıqalǵan jaǵdaıda memleket ony turaqtandyrý úshin barlyq qajetti sharany qabyldaıtynyna sendiredi. Onyń atap ótýinshe, ol úshin qajetti tetikterdiń bári bar.
— Birinshiden, elimizde janar-jaǵarmaı qory jetkilikti. Atap aıtqanda, benzın men dızel otynynyń árqaısysynan 400 myń tonnadan astam qor bar. Zaýyttarymyz shtattyq rejımde jumys istep, ónimdi qalypty kólemde óndirip jatqanyn atap ótkim keledi. Ónimdi qalalarǵa jóneltý de shtattyq rejımde júzege asyrylyp jatyr. Sondyqtan dúrbeleń týǵyzyp, sonyń saldarynan suranystyń kúrt artýyna jáne baǵanyń sharyqtaýyna negiz bolatyn eshqandaı jaǵdaı joq, — dedi ol.
Buǵan deıin elimizdegi benzın, dızel otyny jáne avtogaz baǵasyn jazǵan edik.
