Janarmaı beketterine 10 mln teńge aıyppul salyndy - Túrkistan oblysy
TÚRKІSTAN. QazAqparat - Túrkistan oblysynda janarmaı satatyn beketterge 10 mln teńgeden asa aıyppuldar salyndy. Bul týraly QR UEM Tabıǵı monopolııalardy retteý, básekelestikti jáne tutynýshylardyń quqyqtaryn qorǵaý komıtetiniń Ońtústik Qazaqstan oblysy (Túrkistan oblysy - avt.) boıynsha departamentiniń baspasóz qyzmetine sillteme jasap QazAqparat habarlaıdy.
Departamenttiń habarlaýynsha, óńirde AI-92/93 markaly benzındi kóterme saýdada satatyn naryq sýbektileriniń baǵalardy (tarıfterdi), jeńildetýlerdi, ústeme aqylardy (qosymsha aqylardy) jáne (nemese) ústeme baǵalardy belgileýge nemese ustap turý faktisi boıynsha tekserý sharalary júrgizilgen. Nátıjesinde básekelestikti qorǵaý salasynda túrli zańbuzýshylyqtar anyqtalǵan.
«Departamenttiń tergep-tekserýge laýazymdy tulǵasymen Túrkistan oblysynda AI-92/93 markaly benzındi kóterme saýdada satatyn 7 naryq sýbektilerine qatysty Qazaqstan Respýblıkasy «Ákimshilik quqyq buzýshylyq týraly» kodeksiniń 159-baby 1-bóligine sáıkes, ákimshilik quqyq buzýshylyq týraly hattama toltyryldy. Nátıjesinde, Shymkent qalasynyń mamandandyrylǵan ákimshilik soty jáne Saryaǵash aýdanynyń mamandandyrylǵan ákimshilik sotymen barlyǵy 8 313 919 teńge monopolııalyq kiristerin tárkileı otyryp, monopolıstik qyzmetti júzege asyrý nátıjesinde alynǵan kiristen 10 273 262 teńge mólsherinde aıyppul salyndy» delingen habarlamada.
