Janarmaı baǵasynyń ózgerýi taýar baǵasyna áser etýi múmkin — Ulttyq bank
ASTANA. KAZINFORM — Qazaqstanda janar-jaǵarmaı baǵasynyń ósýi ınflıatsııaǵa qosymsha qysym túsirýi múmkin. Alaıda Ulttyq bank úshin otynnyń tikeleı qymbattaýynan góri, onyń tasymal shyǵyndary men ózge taýarlar baǵasyna yqpaly mańyzdy. Bul týraly Ulttyq bank tóraǵasynyń orynbasary Aqyljan Baımaǵambetov aıtty.
Onyń aıtýynsha, qyrkúıekte janar-jaǵarmaı baǵasynyń jyldyq ósimi shamamen 10,4-10,5% bolǵan. Al qazanda bul kórsetkish 8,4-8,5%-ǵa deıin tómendegen. Buǵan ótken jyldyń qazan aıyndaǵy otyn baǵasynyń edáýir ósýi salystyrý bazasynan shyǵýy da áser etken.
Ol janarmaı baǵasynyń ózgerýi tutyný sebetine tikeleı áser etýmen shektelmeıtinin atap ótti. Benzın men dızel tasymal qunyna yqpal etedi. Al logıstıkalyq shyǵyndardyń artýy basqa taýarlar men qyzmetterdiń baǵasynan kórinýi múmkin.
— Biz úshin baǵanyń tikeleı úlesinen góri, onyń basqa salalarǵa taraıtyn janama áseri mańyzdy, — dedi Ulttyq bank tóraǵasynyń orynbasary.
Onyń aıtýynsha, retteýshi benzın baǵasynyń ósýine bazalyq mólsherleme arqyly tikeleı jaýap bermeıdi. Negizgi nazar janarmaı qymbattaǵannan keıin ózge taýarlar men qyzmetterdiń baǵasy qalaı ózgeretinine aýdarylady.
Aqyljan Baımaǵambetov janarmaı qunynyń ósýin kelesi jylǵa arnalǵan ınflıatsııalyq táýekelderdiń biri retinde atady.
Sonymen qatar ol Qazaqstanda janarmaı óndirisiniń tıimdiligin arttyrý, otandyq óndirýshilerdi qqajetti shıkizatpen qamtamasyz etý jáne saladaǵy múddeler teńgerimin saqtaý mańyzdy ekenin aıtty.
Aıta keteıik, buǵan deıin, benzın óndirisinen bastap tutynýshyǵa deıingi búkil protsess tekserilip jatqanyn jazǵan edik.
