Janarmaı baǵasyn retteýden ketý jemisin bere bastady – Premer-mınıstr

ASTANA. KAZINFORM – Premer-mınıstr Oljas Bektenov Parlament palatalarynyń birlesken otyrysynda janar-jaǵarmaı baǵasyn yryqtandyrý ekonomıkaǵa qalaı áser etkenin aıtty.

- Bıyl ekonomkalyq ósimniń dınamıkasy aıtarlyqtaı jaǵymdy. 5 aıdyń qorytyndysy boıynsha JІÓ ósimi 6 paıyz kórsetkenin bilesizder. Bizdiń paıymdaýymyzsha, basty kórsetkishtiń biri – negizgi kapıtalǵa salynatyn ınvestıtsııa kólemi. 5 aıdyń qorytyndysy boıynsha 18 paıyzdan asady. Ekinshi deńgeıli bankterdiń bıznesti nesıelendirý kólemi byltyrǵymen salystyrǵanda 16 paıyzdan asqanyn jaǵymdy kórsetkish dep ataýǵa bolady, - dedi Úkimet basshysy.

Sondaı-aq, 5 aıda ol jaqsy ósim kórsetken salalardy atady.

- Salalarǵa kelsek, qurylys salasynda dınamıkalyq ósim bar – 15 paıyzdan joǵary. Kólik jáne qoımalaý salasynda ósim 23 paıyzdan joǵary ósim bar. Qaıta óńdeý ónerkásibi 6 paıyz qarqynmen, saýda salasy 8 paıyzben ósip keledi. Osy salalar dınamıkalyq ósim qamtamasyz etip otyr. Bizdiń endigi mindet – osy qarqyndy saqtap, arttyrý, - dedi Oljas Bektenov.

Aıtýynsha, eldiń janar-jaǵarmaı óndirisine ınvestıtsııa qaıta orala bastaǵan.

- Meniń paıymdaýymsha, janar-jaǵarmaı naryǵyn yryqtandyrý sharasy jaǵymdy áseri tıgizip jatyr. Janarmaı baǵasyn uzaq jyldar boıy memleket rettep kelgendikten naryqtaǵy shynaıy konıýktýraǵa saı bolmady. Úkimet baǵalardy yryqtandyrý jolyna tústi. Bul jumys qazirdiń ózinde nátıjesin berip jatyr. Investıtsııa osy salaǵa birtindep qaıta oralyp jatyr. Óıtkeni buǵan deıin bul sala ınvestıtsııalyq turǵydan tartymsyz bolatyn. Jeke bıznes memleket baǵany yryqtandyrýǵa kóshkenin kórip otyr, - dedi Premer-mınıstr.

Aıta keteıik, Úkimet úıinde Parlament palatalarynyń birlesken otyrysy ótip jatyr.