Janarmaı baǵasyn kórshi eldermen teńestiremiz — Roman Sklıar

ASTANA. KAZINFORM — Premer-mınıstrdiń birinshi orynbasary Roman Sklıar Úkimet úıindegi baspasóz máslıhatynda Qazaqstandaǵy janarmaı baǵasy kórshi elderdegi baǵamen teńestirletinin aıtty.

— Biz qazir jylyna 90 mıllıon tonnadan astam munaı óndiretin elmiz. Biraq munaı ónimderin jetkilikti deńgeıde óńdep otyrǵan joqpyz. 2017-2019 jyldary biz janar-jaǵarmaı óndirý kólemin edáýir arttyra otyryp, úsh zaýytty qaıta qurýdy aıaqtadyq. Janarmaı túrlerin aıtsaq, benzın, dızel jáne áýe kerosıni boıynsha tapshylyq 2019 jylǵa qaraı toqtady. Alaıda, áýe kerosınin tutynýdyń aıtarlyqtaı óskenin eskersek, tapshylyq baıqalyp otyr, — dedi Roman Sklıar.

Vıtse-premer janar-jaǵarmaıdyń baǵasyn kórshi naryqtarǵa jaqyndatý saıasaty júrip jatqanyn eske saldy.

— Biz janarmaı syrtqa satylyp ketpeý úshin baǵasyn birtindep kórshiles eldermen teńestiremiz. Al ishki óndiris ulǵaıtý josparyna kelsek, Shymkent munaı óńdeý zaýytynyń ekinshi kezegin salý josparlanyp otyr. Bul Shymkentte munaı óńdeý kólemin 6 mln tonnadan 12 mln tonnaǵa deıin ulǵaıtýǵa múmkindik beredi. Sondaı-aq, Pavlodar jáne Atyraý zaýyttarynyń qýatyn arttyrý baǵytynda is-sharalar qolǵa alynady, — dedi Premer-mınıstrdiń birinshi orynbasary.

Aıta keteıik, keshe Roman Sklıar Airbus-tyń Eýropa boıynsha prezıdenti Joan Pelısemen avıatsııa salasyndaǵy yntymaqtastyqty damytý jaıyn talqylap, Qazaqstan aýmaǵynda azamattyq jáne memlekettik avıatsııa ushaqtaryn jóndeý men qyzmet kórsetý ortalyǵyn ashý qajettigin málimdegen bolatyn.