Janarmaı baǵasy men QQS ósýi taksı baǵasyna qalaı áser etedi – mınıstr jaýaby
ASTANA. KAZINFORM – Kólik mınıstri Marat Qarabaev Úkimet otyrysynan keıin ótken baspasóz máslıhatynda qosylǵan qun salyǵyn kóterý bastamasy men janarmaı baǵasynyń naryqqa berilýi taksı baǵasyna qalaı áser etetini týraly pikir bildirdi.
- Áýe qyzmeti boıynsha, avıaotyn áýelden naryqtyq baǵamen retteledi. Sondyqtan siz aıtyp otyrǵan ózgerister ol jaqqa eshqandaı áser etpeıdi. Temirjol baǵasyn memleket retteıtinin jaqsy bilesizder. Bul jaqta da poıyz bıletiniń qymbattaýyn josparlap otyrǵan joqpyz. Taksıge kelsek, ol jaqta janarmaı naryqqa berilip jatyr, ıaǵnı bul jaqta baǵany naryq aıqyndaıdy, - dedi ol.
Mınıstr keleshekte taksı baǵasyn qarapaıym júrgizýshiler men ınternet agregatorlar ózara kelisip aıqyndaýy múmkin ekenin atap ótti.
- Jalpy taksı qyzmetiniń baǵasy naryqta. Onsyz da ony memleket rettep otyrǵan joq. Biraq biz osy saladaǵy ózin-ózi retteý týraly zań jobasyn talqylap jatyrmyz. Sol zań jobasynyń aıasynda biz ne berip otyrmyz? Alpaýyt ınternet agregaty men taksı júrgizýshileri ózara kelisip, sondaı bir kelisimge kelýge bolady. Mysaly, 1 shaqyrymǵa adam tasymaldaýdyń quny qansha bolady degen sııaqty. Odan agregattyń alatyn paıyzy qansha bolatynyn kelisýge bolady. Buǵan memleket aralaspaıdy kólik ıeleri men agregat ózara kelisimge keledi degen norma usynyp otyrmyz. Osy zań normasy boıynsha pılottyq túrde jumys bastaımyz dep josparlandy, - dedi Marat Qarabaev.
Buǵan deıin bıyl eldegi avtojoldardyń aqyly ýchaskelerindegi tarıfter orta eseppen 30 paıyzǵa ósýi josparlanǵany málim bolǵan edi.