«Janarmaı - 125 teńge boldy» - respýblıkalyq basylymdarǵa sholý
ASTANA. Qarashanyń 3-i. / QazAqparat/ - Qazaq aqparat agenttigi respýblıkalyq basylymdarda qarashanyń 3-i, seısenbi kúni shyqqan ózekti materıaldarǵa sholýdy usynady.
Qazaqstan Respýblıkasynyń Prezıdenti Nursultan Nazarbaevtyń Iordan Hashımıttik Koroldigine resmı sapary qarsańynda Ammanda túrli sharalar ótýde. Bul týraly tolyǵyraq «Egemen Qazaqstan» basylymynyń búgingi sanyndaǵy «Eki eldiń ortaq umtylysy», «Eldiktiń taǵy bir qyry» jáne «Murajaılar elinde» degen maqalalardan oqı alasyzdar.
Keshe Premer-Mınıstr Kárim Másimovtiń tóraǵalyǵymen Úkimette kezekti selektorlyq keńes bolyp ótti. Onda Memleket basshysynyń bergen naqty tapsyrmalaryna baılanysty ekonomıkanyń damýyn jandandyrý týraly máseleler qaraldy. Atalmysh jınalys týraly tolyǵyraq bilgińiz kelse, osy basylymdaǵy «Ekonomıkalyq damýdy jandandyrý mindeti» degen taqyryppen berilgen maqalaǵa nazar aýdaryńyz.
Osy taqyryptaǵy maqalany «Aıqyn» gazetiniń búgingi sanynan da oqýǵa bolady.
«Talaı jastardyń, sonyń ishinde qazaqstandyq ózge ult jastarynyń memlekettik tilge degen qurmetin, ony bilýge degen ynta-nıetiniń artqanyn kórip otyrmyz. Sondyqtan keıbireýler aıtyp júrgendeı, til festıvali bul qur esep berý emes», dep jazady mádenıet jáne aqparat vıtse-mınıstri Ǵazız Telebaev. Vıtse-mınıstrdiń osy jaıynda egjeı-tegjeıli jazylǵan maqalasy «Til festıvali: izdenis jáne nátıje» degen taqyryppen berilgen.
***
«Almatyny Qazaqstandaǵy baǵa saıasatynyń barometri deýge bolatyn shyǵar. Sol barometr megapolısimizde janarmaı lıtiriniń baǵasy 125 teńgege jetti», deıdi «Aıqyn» gazeti. Janarmaı jaǵdaıynyń jaı-japsaryna tereń úńilgen maqala «Janarmaı - 125 teńge boldy» degen taqyryppen berilgen.
Sondaı-aq atalmysh basylymnyń kúndelikti «Aq sóıle» aıdary «Ekonomıka damysyn desek, syrtqy naryqqa shyǵyp, básekege túsý shart» degen taqyryppen Qazaqstan Respýblıkasy Prezıdenti janyndaǵy Qazaqstan strategııalyq zertteýler ınstıtýty ekonomıkalyq zertteýler bóliminiń meńgerýshisi Anar Rahymjanovamen bolǵan suhbatyn jarııalady. Suhbat naryqtyq ekonomıka jáne basqa da ózekti máseleler tóńireginde oı órbitedi.
***
Al endi búgingi tańda álemniń túkpir-túkpirinde el namysyn qorǵap júrgen jigitterge keler bolsaq, astanalyq Asan Bazaev óz sheberligimen de, nátıjeli kórsetkishimen de kózge túsetin juldyzdardyń birine aınalyp keledi. Asan jaqynda ǵana áıgili «Týr de Frans» kópkúndik báıgesinde «Astana» klýbynyń namysyn qorǵap qaıtqan bolatyn. «Astana aqshamy» gazetiniń seısenbilik sanynda «Maqsatyma jetken soń Astanama qaıtyp oralamyn» degen taqyryppen aıtýly sportshy Asan Bazaevpen bolǵan suhbat jarııalandy.
Sondaı-aq «Astana aqshamy» gazetiniń búgingi nómirinde halyqaralyq «Alash» syılyǵynyń laýreaty Turlybek Mámeseıittiń «Qaǵysý» atty hıkaıasy berilipti.
«Birikken Arab Ámirligine jumys sapary sheńberinde, dúısenbi kúni Memleket basshysy Nursultan Nazarbaevtyń BAÁ Prezıdenti Sheıh Halıf ben Zaıd Ál Nahaıanmen kezdesýi ótti», dep jazady «Kazahstanskaıa pravda» gazeti. Osy kúni Elbasy Nursultan Nazarbaev NSVS bankiniń bas menedjeri S.Kýper bastaǵan basshylyǵyn qabyldap, Qazaqstanda jańa qarjy quraldaryn engizý, ıslam bankıngin damytý máselelerin talqyǵa salǵan. Basylymnyń jazýynsha, BAÁ Prezıdenti Sheıh Halıf ben Zaıd Ál Nahaıannyń shaqyrýy boıynsha BAÁ-ge jumys saparymen barǵan Memleket basshysy Nursultan Nazarbaev «Formýla-1» halyqaralyq jarysynyń qorytyndy kezeńiniń saltanatyna qatysqan.
«Izvestııa-Kazahstan» gazetiniń jazýynsha, Qazaqstannyń ońtústiginde shamamen eki aıǵa sozylǵan benzın tasymalyndaǵy irkilis óńirdegi janarmaı baǵasynyń joǵarylaýyna túrtki bolǵan. Bul jaıynda Astana dúısenbi kúni resmı jarııalaǵan. Degenmen, Almatyda benzın baǵasy demalys kúnderden bastap-aq jańa baǵamen satylymǵa túsken. Máselen, juma kúni AI-92 benzıniniń lıtri qala boıynsha ortasha eseppen 72 teńge bolsa, al jeksenbi kúni 86-88 teńgege deıin joǵarylaǵan. Otyn-energetıkalyq keshenge monıtorıng jáne taldaý basqarmasynyń bastyǵy Erkeǵalı Álimqulovtyń aıtýynsha, Qazaqstanda joǵary oktandy benzınniń kóterme baǵasy 12 paıyzǵa qymbattaǵan.
«Vremıa» basylymynyń seısenbilik sanynda, elimizge 150 kılogrammǵa jýyq zergerlik buıymdardy zańsyz alyp ótpek bolǵan kontrabandyshylar tobynyń quryqtalǵanyn dúısenbi kúni QR UQK qyzmetkerleri habarlaǵanyn jazǵan. Tapqyr top qazannyń 31-i kúni Almaty halyqaralyq áýejaıynda bultartpas aıǵaqtarmen qolǵa túsken. QR UQK Almaty qalasy boıynsha departamentiniń asa mańyzdy ister jónindegi aǵa tergeýshisi Qajyǵalı Muqashevtiń baspasóz máslıhatynda habarlaǵanyndaı, qazan aıynyń sońǵy kúni eki birdeı kontrabandalyq fakt anyqtalǵan. Bastapqyda Ystambuldan Almatyǵa qatynaıtyn áýe baǵytymen kelgen azamattardyń chemodanynan 8 myńǵa jýyq altyn jáne 10 myńnan astam kúmis buıymdar tárkilengen. Barlyq áshekeılerdiń salmaǵy 115 kg jýyq. Al sodan keıin Bangkok áýe baǵytymen kontrabandyshylardyń sybaılastary ushyp kelgen. Olardan da UQK qyzmetkerleri salmaǵy 35 kılogrammnan asatyn 5 myńnan astam zergerlik buıymdar tapqan.
