Jańarǵan jyl basy eńsesi bıik eldiktiń tuǵyryn nyǵaıtyp, rızyq-nesibesin ala kelsin — Bektenov

ASTANA. KAZINFORM — Premer-mınıstr Oljas Bektenov qazaqstandyqtardy Naýryz meıramymen quttyqtady. Bul týraly Úkimettiń baspasóz qyzmeti habarlady.

Barshańyzdy bereke-birliktiń bastaýy, izgilik pen jaqsylyqtyń jarshysy – Naýryz meıramymen shyn júrekten quttyqtaımyn!

Prezıdentimiz Qasym-Jomart Toqaevtyń bastamasymen Áz-Naýryzdy toılaý dástúri mazmuny jaǵynan jańasha sıpatqa ıe bolyp, ulyq mereke óskeleń urpaq úshin eseli eńbek pen ónegeli isterdiń uıytqysyna aınaldy.

Tabıǵat-Anany meıirimge bólep, tirshilik ataýlyny túrlendirgen shýaqty meıram tarıhymyzdy dáriptep, rýhanı qundylyqtarymyzdy damytýǵa úles qosyp keledi. Jańarǵan jyl basy eńsesi bıik eldiktiń tuǵyryn nyǵaıtyp, memleketimizge rızyq-nesibesin ala kelsin.

Halqymyzǵa tán baýyrmaldyq pen ózara janashyrlyq sııaqty asyl qasıetter ár shańyraqqa shattyq pen qýanysh syılasyn.

Sizderge zor densaýlyq, otbasylaryńyzǵa baıandy baqyt tileımin! Ulys oń bolsyn, yrys mol bolsyn, - dedi Úkimet basshysy.

Aıta ketelik bıyl Qazaqstanda Naýryz merekesiniń toılanyp júrgenine 37 jyl bolady.