Jańarǵan Túrkistan: Bes jylda 6,1 mln sharshy metr baspana salynady
NUR-SULTAN. QazAqparat – 2025 jylǵa deıin Túrkistan qalasynda 15 mektep, 10 densaýlyq saqtaý nysany jáne 6,1 sharshy metr turǵyn úı paıdalanýǵa beriledi. Bul týraly Túrkistan oblysynyń ákimi Ómirzaq Shókeev aıtyp berdi, dep habarlaıdy QazAqparat tilshisi.
«Qalanyń bas jospary jobasynda 2025 jylǵa deıin 15 mektep jáne qoldanystaǵy mektepterge 900 oryndyq 3 qosymsha qurylys qaralǵan. Bul nysandar 17,2 myń oqýshyǵa arnalǵan. Sonymen birge, 5,7 myń orynǵa arnalǵan qosymsha jáne 44 mektepke deıingi mekeme qarastyrylǵan.
10 densaýlyq saqtaý obektisi, onyń ishinde aýysymyna 900 kelýshige arnalǵan 3 emhana qarastyrylǵan», - dedi oblys basshysy Úkimettiń búgingi otyrysynda.
Qalanyń bas josparynda 2035 jylǵa deıin 40,1 myń oqýshyǵa arnalǵan 28 mektep jáne 10 qosymsha qurylys qarastyrylǵan. 15,7 myń orynǵa arnalǵan 53 mektepke deıingi mekeme jáne aýysymyna 3600 kelýshige arnalǵan 9 ambýlatorııalyq-emhanalyq keshen obektisi josparlanǵan.
«2019 jyldyń basyna qalanyń turǵyn úı qory 3,8 mln sharshy metr bolǵan edi, onyń basym bóligi – bir qabatty úı-jaı túrindegi turǵyn úıler, olardyń úlesine barlyq turǵyn úıdiń 92,2% keledi. 2025 jyly turǵyn úı qory – 6,1 mln sharshy metrge deıin jetedi dep josparlanýda. Bul rette 170,6 myń sharshy metr eski úıler buzylady. Al 2035 jyly turǵyn úı qory 9,8 mln sharshy metrge deıin nemese bir adamǵa shaqqanda 28 sharshy metrge deıin ósedi dep kútilýde», - deıdi Ómirzaq Shókeev.
Eske sala ketsek, QR Úkimetiniń búgingi otyrysynda Túrkistan qalasynyń bas jospary jobasy qaraldy jáne maquldandy.
Qala jobasy ákimshilik-iskerlik ortalyq, rýhanı-mádenı ortalyq, turǵyn alaptary, jańa qurylys alańdary, óndiristik jáne tabıǵı-rekreatsııalyq aýmaqtar bolyp birneshe bólikke bólinedi.
