Jańarǵan Qordaı: Jańa mektepter, turǵyn úıler salynyp, gaz qubyry tartylady
Bıyl aýdandaǵy 387 áleýmettik-ınfraqurylymdyq nysandy júzege asyrýǵa memlekettik bıýdjetten 21 mlrd teńge bólindi. Olar «Nurly jer», «Nurly jol», Jumyspen qamtýdyń jol kartasy jáne Óńirlerdi damytý baǵdarlamalary aıasynda júrgiziledi.
«Aýdandyq mańyzy bar joldar jóndelip, uzyndyǵy 7,5 shaqyrym bolatyn «Aýqatty - Báıterek» avtojoly salynyp jatyr. 60 páterli úsh úı men 50 páterlik bir turǵyn úı qurylysy bastaldy. Úsh aýylda – Masanshy, Kúnbatys, Qolǵatyda 930 oryndyq úsh jańa mektep salynady. Olardyń jalpy quny 2 mlrd 400 mln teńgeni qurady. Qordaı, Betqaınar, Otar, Áljan ana aýyldarynda 4 jańa sport kesheniniń qurylysy júrip jatyr», - dedi spıker Ortalyq kommýnıkatsııalar qyzmetinde ótken onlaın baspasóz máslıhatynda.
Qordaı aýylynda jalpy uzyndyǵy 53 shaqyrym bolatyn kósheler jóndeýden ótedi. Qarakemer, Sortóbe, Masanshy, Bular batyr aýyldarynda jalpy sany 254 shaqyrym jol jóndelmek.
«Úsh aýyldyń turǵyndary aýyz sýmen qamtamasyz etilip, Qarakemer, Masanshy, Sortóbe, Aýqatty, Bular batyr aýyldarynda densaýlyq saqtaý nysandary qaıta jóndeledi. Bes eldi meken - Qarakemer, Masanshy, Sortóbe, Aýqatty, Bular batyrda gaz qubyry tartylyp, 56 myń turǵyn jyl sońyna deıin gazben qamtylady. Barlyq jobalar aýdannyń ekonomıkasy men ınfraqurylymyn damytýǵa baǵyttalady. Jyldar boıy halyqty tolǵandyryp kelgen máseleler jyl sońyna deıin sheshiledi», - dedi E. Jylqybaev.
Atalǵan memlekettik baǵdarlamalar aıasynda 3 208 jańa jumys orny qurylady. Oǵan negizinen jergilikti turǵyndar jumyspen qamtý ortalyqtary arqyly tartylady.
Buǵan deıin spıker aýdanda zardap shekken 65 nysannyń 54-inde qalpyna keltirý jumystary bastalǵanyn habarlady.
Asyraýshysynan aıyrylý jaǵdaıyna baılanysty, qaıtys bolǵan jandardyń otbasylaryna aı saıyn orta eseppen 55 myń teńge áleýmettik járdemaqy taǵaıyndalyp, tólenip jatyr.
Eske sala ketsek, 7 aqpan kúni Jambyl oblysy Qordaı aýdanyndaǵy Masanshy aýylynyń turǵyndary arasynda jappaı tóbeles boldy.
Oqıǵa ornynda 8 adam, aýrýhanada 2 adam kóz jumdy.
Jambyl oblysynyń Qordaı aýdanynda ultaralyq tatýlyq pen kelisimdi saqtaý jáne nyǵaıtýǵa baǵyttalǵan «Beıbitshilik pen kelisim» atty jańa joba qol alyndy.
