Janarbek Áshimjan Alataý halqy Prezıdenttiń bastamasyn zor yqylaspen kútip otyr

ASTANA. KAZINFORM — Májilis depýtaty Janarbek Áshimjan Úkimet basshysy Oljas Bektenovtiń atyna joldaǵan saýalynda Alataý qalasynyń bas josparyn jyldamdatyp iske asyrýdy surady. 

— Memleket basshysy óziniń kezekti Joldaýynda Alataý qalasynyń ınstıtýtsıonaldyq negizderin qalyptastyrýdy, sondaı-aq arnaıy mártebesin aıqyndaıtyn zań jobasyn Parlament qaraýyna engizýdi tapsyrdy. Prezıdenttiń bul bastamasy — óńir halqy men Alataý jurtshylyǵyna degen shynaıy janashyrlyq pen strategııalyq kózqarastyń aıqyn kórinisi, — deıdi depýtat.

Sondaı-aq, ol Alataý qalasyndaǵy ómir sapasyn kóterý úshin bas jospardy ýaqtyly júzege asyrý mańyzdy ekenine toqtaldy.

— Úkimet qalanyń bas josparyn bekitti. Jergilikti atqarýshy organdar tarapynan ınfraqurylymdyq jobalardy iske asyrýdy jedeldetý kerekpiz. Sonymen qatar, qala qurylǵanyna 1,5 jyl ótse de, kóptegen jobanyń jobalyq-smetalyq qujattamalary keshigip jatyr.

Onyń ishinde, Zarechnyı men Jetigen eldimekenderindegi asa zárý mádenıet úıleri, sport kesheni men aýyz sý júıelerine qatysty jobalardy tez arada jergilikti ákimdik daıyndaý tıis.

Qalanyń qajettiligi úshin qaıtarylǵan jer telimderine qatysty sheshimin tappaǵan máseleler bar.

Bas josparǵa sáıkes, Alataý qalasynda 168 mektep, 219 balabaqsha, 102 medıtsınalyq mekeme salynýy tıis.

Prezıdenttiń tapsyrmasyna sáıkes jergilikti ákimdik Úkimetpen birlesip, bul máselelerdi júzege asyrýy tıis, — dedi Janarbek Áshimjan.

Eske salsaq, Prezıdent Qasym-Jomart Toqaev bıylǵy Joldaýynda Alataý qalasyna Úkimetke tikeleı baǵynatyn arnaıy quqyqtyq mártebe berýdi tapsyrǵan bolatyn.