Janar-jaǵarmaıdyń aktsızdik mólsherlemeleri qaıta qaralady

NUR-SULTAN. QazAqparat – Janar-jaǵarmaıdyń aktsızdik mólsherlemeleri qaıta qaralady. Bul týraly úkimet otyrysynda Qarjy mınıstri Erulan Jamaýbaev málim etti, dep habarlady QazAqparat tilshisi.

«Bıýdjetke qosymsha túsimderdi qamtamasyz etý boıynsha qazir taý-ken metallýrgııa keshenindegi jer qoınaýyn paıdalanýshylardan túsimderdi arttyrýǵa qatysty tetikter ázirlenýde», - dedi mınıstr.

Onyń aıtýynsha, janar-jaǵarmaı naryǵynda ústeme baǵalarǵa shekteý qoıý kózdelip otyr.

«Sondaı-aq, mólsherlemeler qaıta qaralady jáne ústeme baǵa shekteledi. Bul satýshylardyń qosymsha tabystaryn bıýdjetke túsirýge múmkindik beredi», - dedi Erulan Jamaýbaev.

Eske salsaq, Úkimet otyrysynda QR Ulttyq bankiniń tóraǵasy Erbolat Dosaev kapıtaldy negizsiz shyǵarýǵa qarsy is-qımyl qalaı uıymdastyrylatynyn túsindirdi.

«Joǵaryda atalǵan buıryqqa sáıkes operatsııalar júrgizýge arnalǵan ótinimder boıynsha is-qımyldar algorıtmi qabyldandy, sondaı-aq kúsheıtilgen qarjylyq monıtorıng júrgizilýi tıis transshekaralyq operatsııalardyń tizbesi bekitildi. Talaptar aıqyn buzylǵan jaǵdaıda, mundaı operatsııalar jedel toqtatylatyn bolady. Qabyldanyp jatqan sharalar aqshany jylystatýǵa qarsy kúrestiń eń úzdik álemdik praktıkasyna negizdeledi jáne KYC (know your client) qaǵıdattaryn tolyqqandy engizedi», -dedi Erbolat Dosaev.