Janar-jaǵarmaıdy zańsyz shetel asyrmaq bolǵan 95 kólik júrgizýshisi jazalandy

ASTANA. QazAqparat – Jambyl jáne Túrkistan oblystarynda janar-jaǵarmaıdy el aýmaǵynan zańsyz shetelge shyǵarmaq bolǵan kólik júrgizýshileri anyqtalyp, jaýapqa tartyldy. Bul týraly Іshki ister mınıstrliginiń ókili Shuǵyla Turlybek málim etti, dep habarlaıdy QazAqparat tilshisi.

«10 sáýirden bastap Jambyl jáne Túrkistan oblystarynda ishki ister organdary kóliktik baqylaý ınspektsııasymen birlesip elden janar-jaǵarmaı materıaldaryn áketýge jol bermeý boıynsha reıdtik is-sharasyn júrgizdi. Janar-jaǵarmaı tasymaldaýda kólik quraldaryn paıdalaný erejelerin buzýshylyqty anyqtaý polıtsııanyń erekshe nazarynda», - dedi Shuǵyla Turlybek ІІM-de ótken brıfıngide.

Onyń aıtýynsha, reıd barysynda zańbuzýshylyqtar anyqtaldy.

«QR Ákimshilik quqyqbuzýshylyq týraly kodekstiń 590-babynyń 7-bóligi (ruqsatsyz jabdyqtalǵan kólik quralyn basqarý) boıynsha ákimshilik jaýapkershilik kózdelgen. Jedel aldyn alý sharasynyń qorytyndysy boıynsha joǵaryda atalǵan bapty buzǵany úshin 95 júrgizýshi jaýapqa tartyldy. 27 ákimshilik materıal boıynsha kólik quralyn odan ári paıdalanýǵa tyıym salyndy», - deıdi ol.

Aıta ketsek, qazaqstandyq polıtseıler ótken apta ishinde kisi ólimine qatysty 7 qylmysty ashty.

Sondaı-aq, elektr samokatpen jolaýshy, júk tasýǵa tyıym salynatyny belgili boldy.