Janar-jaǵarmaı ónimderin tıisti lıtsenzııasyz satyp, 501 mln. teńge tabys tapqan JShS dırektory aıyppul tólep qutyldy

Bul týraly búgin QR Ekonomıkalyq qylmysqa jáne sybaılas jemqorlyqqa qarsy kúres agenttiginde ótken brıfıng barysynda resmı ókili Murat Jumanbaı málim etti.

«Almaty qalasynda «Miga Group» JShS-niń dırektory Skrıabınge aıyppul tóleý jazasy kesildi. Ol 2008 jylǵy qyrkúıekten 2009 jylǵy qańtar aralyǵynda janar-jaǵarmaı ónimderin tıisti lıtsenzııasyz satýdan 501 mln.teńge zańsyz tabys tapqan», - dedi ol.

Sondaı-aq Shyǵys Qazaqstan oblysynda «Janar» JShS dırektory mindetin atqarýshy Jarpekov 2009 jylǵy tamyzdan 2012 jylǵy qańtaryna deıingi aralyqta  janar-jaǵarmaıdy tıisti ruqsatsyz satyp, 33 mln.teńge tabys tapqan.

Al Pavlodar oblysynda jeke kásipker Kovtýn «Pavlodar-Omby» tas jolynda ornalasqan janarmaı quıý beketinde tıisti lıtsenzııasyz munaı ónimderin satyp, nátıjesinde 130 mln. teńge tabys tapqan.

«Sot Kovtýnnan memleket kirisine 6 mln. teńge óndirip alý týraly sheshim qabyldady», - dedi resmı ókil.