Janar-jaǵarmaı baǵasynyń kúrt ósýi jaýapsyzdyq normasyna aınaldy - depýtat
«Búgingi tańda bizdiń saılaýshylardy tolǵandyratyn mańyzdy máselelerdiń biri - negizgi áleýmettik mańyzy bar azyq-túlik ónimderiniń, ásirese nannyń baǵasy. Bul másele depýtattyq saýaldarda birneshe ret kóterilgenmen, áli de óz sheshimin tappaı otyr. Bıylǵy kóktem-jaz aılarynda sábiz ben kartop baǵasynyń 500-600 teńgege deıin ósýi úlken rezonans týdyrdy. Alaıda, Aýyl sharýashylyǵy mınıstrligi tarapynan eshqandaı tujyrym jasalǵan joq. Sońǵy ýaqytta negizgi áleýmettik mańyzy bar azyq-túlik ónimderi baǵasynyń ósýine qatysty máseleler kóbirek kóterilip keledi, halyq baǵalardyń rettelmeıtinine, tipti keıde ártúrli bolatynyna shaǵym jasaýda. Mysaly, eń tanymal 1-surypty un 150-200 teńge aralyǵynda satylady jáne odan ári ósý úrdisi bar. Al un baǵasy jazdyń ózinde 120-130 teńge deńgeıinde boldy», - dedi Ǵ. Ámireev.
Onyń aıtýynsha, bıyl qazaqstandyq aýyl sharýashylyǵy taýaryn óndirýshiler úshin qurǵaqshylyq saldarynan túsimniń tómendigi eleýli soqqy boldy. Aldyn ala boljam boıynsha biz 30% - ǵa deıin ónimge qol jetkize almaımyz.
«Sonymen qatar, ýákiletti organdardyń jaýapsyzdyǵynan biz janar-jaǵarmaıdyń, dızel otynynyń joǵary baǵasyn baıqaımyz. Lıtrine 300 teńgege deıin jetip, keı ýaqytta eldiń janarmaı beketterinde tapshy da bolyp qalady. Munyń bári ekonomıkalyq dıversııaǵa óte uqsas, al bul - Energetıka mınıstrliginiń jaýapkershiligi. Sondaı-aq, tyńaıtqyshtardyń, aýyl sharýashylyǵy tehnıkasy qunynyń jyl saıynǵy ósýin de atap ótý qajet. Barlyq osy faktorlar jıyntyǵynda astyq baǵasyna áser etti. Bireýler úshin janar-jaǵarmaı baǵasynyń kúrt ósýi normaǵa, jaýapsyzdyq normasyna aınaldy. Bul únemi, dálirek aıtqanda kóktemgi egis jumystary men egin jınaý kezinde oryn alyp keledi. Bul týraly depýtattar da birneshe ret másele kótergen bolatyn, biraq burynǵy jartas sol jartas kúıinde, bul aýylsharýashylyq mamandary úshin eń jaýapty sátte qasaqana jasalatyndaı áser qaldyrady», - dedi depýtat.
«Eger jaqyn arada biz halyqty ústelinde bolatyn basty ónimmen – qazirdiń ózinde baǵasy qarqynmen ósip jatqan nanmen, makaronmen jáne jarma ónimderimen qamtamasyz etý máselesin sheshpesek, onyń saldary bıylǵy kóktem men jaz mezgiline qaraǵanda odan da aýyr bolýy múmkin. Joǵaryda baıandalǵandy eskere otyryp, taýar naryqtarynda bıdaıdyń jetkilikti kólemin satyp alý boıynsha ınterventsııa júrgizý úshin «Azyq-túlik kelisim shart korporatsııasy» AQ men turaqtandyrý qorlaryna Úkimet rezervinen qosymsha bıýdjet qarajatyn bólý máselesin sheshýdi suraımyz. Bul keıinnen nan, jarma jáne makaron ónimderi baǵasynyń turaqtanýyn qamtamasyz etetin bolady», - dedi Ǵalym Ámireev.