Halyq keńesi zań bastamasyn kóterip, referendým usynýǵa quqyly — Serik Aqylbaı
ASTANA. KAZINFORM — Jańa Konstıtýtsııaǵa saı qurylatyn Halyq keńesi zań jobalaryn usynýǵa bastamashy bolyp, referendým ótkizý jóninde usynys engize alady. Bul týraly «Qazaqstan zańgerler odaǵy» respýblıkalyq qoǵamdyq birlestiginiń tóraǵasy Serik Aqylbaı Jibek Joly telearnasynyń «Búgin LIVE» baǵdarlamasynda aıtty.
Onyń aıtýynsha, Halyq keńesi halyq pen bılik arasyn jalǵaıtyn konstıtýtsııalyq ókiletti organǵa aınalady.
— Kezinde Ulttyq quryltaıdyń múshesi boldym. Sol ýaqytta óńirlerden kelgen músheler túrli usynys aıtyp, qordalanǵan máselelerdi sheshý joldaryn kóteretin. Sońǵy bes jylda Quryltaı músheleriniń usynystary negizinde 27 zań qabyldandy. Endi Halyq keńesi konstıtýtsııalyq ókiletti organ mártebesine ıe boldy, — dedi Serik Aqylbaı.
Onyń sózinshe, jańa ınstıtýttyń ókileti burynǵydan áldeqaıda keń.
— Halyq keńesi zańdarǵa usynys engizip, zań shyǵarý bastamasyn kótere alady. Sonymen qatar referendým ótkizý máselesin usynýǵa quqyly. Bul — buryn bolmaǵan múmkindik. ıAǵnı halyqtyń pikiri jaı aıtylyp qoımaı, naqty usynys retinde rásimdeledi, — dedi ol.
Serik Aqylbaıdyń aıtýynsha, Halyq keńesi engizgen usynystardy memlekettik organdar mindetti túrde qaraýǵa tıis.
— Memlekettik organdar Halyq keńesiniń usynystaryn qaraýǵa mindetti. Osylaısha halyq pen bılik arasyn jalǵaıtyn jańa ınstıtýt qalyptasady, — dedi ol.
Aıta keteıik, buǵan deıin jańa Konstıtýtsııa halyq bıligin kúsheıtetinin jazǵanbyz.
