Janar-jaǵarmaı 350-370 teńge bolmaıdy - U. Qarabalın

ASTANA. QazAqparat - QR Energetıka mınıstriniń birinshi orynbasary Uzaqbaı Qarabalın senator Lázzat Qıynovtyń janar-jaǵarmaı 350-370 teńge bolýy múmkin degen pikirine qatysty óz oıyn bildirdi.

"Qıynov myrza 350-370 teńgege deıin janar-jaǵarmaı baǵasy qymbattaıdy dep aıtqan joq. Ol keıbir iri munaı ken oryndarynan álemdik baǵamen shıkizat satyp alatyn bolsaq, janar-jaǵarmaı quny da jańaǵy deńgeıde bolar edi degen bolatyn. Shyn máninde biz ol úsh kompanııadan emes, ózge munaı kompanııalarynan satyp alýdamyz. Sonyń ishinde QazMunaıGaz kompanııalary, Ózenmunaıgaz, Mańǵystaýmunaıgaz syndy, PetroQazaqstan jáne basqalary bar. Olar óńdeýge qajetti shıkizatpen qamtamasyz etip keledi. Qazirgi ýaqytta jańa ken oryndaryn ashý jáne barlaý jumystary júrgizilýde, qolda bar óndiristerdi jańartý da júrip jatyr. Eger biz osy iri munaı ken oryndarynan munaı satyp alatyn bolsaq, bul basqa áńgime. Mysaly Teńiz sııaqty jeńil munaıdy 30-25 paıyzǵa deıin qosatyn bolsaq, janar-jaǵarmaıdyń kólemi artady. Sol kezde baǵa ózgerýi yqtımal, biraq bir lıtr janar-jaǵarmaı úshin 370 teńge bolady dep oılamaımyn", - dedi U. Qarabalın Ortalyq kommýnıkatsııalar qyzmetinde ótken brıfıngte.