Janar-jaǵar maıdyń sapasyn kóterýdegi Úkimet jobasyn qoldaımyz - A.Sıdorov
ALMATY. 7 jeltoqsan. QazAqparat /Ádilet Musahaev/ - Elimizdegi avtodılerler saýdalap otyrǵan jańa avtokólikter ekologııanyń eń joǵary standarttaryna saı, alaıda bizdiń jaǵarmaılar ekologııaǵa qatysty jasalǵan búkil áreketterimizge keri áser etip otyr.
Bul jaıynda búgin Qazaqstan avtokólik bıznesi qaýymdastyǵynyń (QABQ) prezıdenti Arsenıı Sıdorov Almatyda arnaıy ótken baspasóz máslıhaty kezinde aıtty.
A.Sıdorov atalǵan qaýymdastyqqa qatysýshy avtodılerler 2014 jyly «Eýro-5» standartyna sáıkes keletin avtokólik janar-jaǵar maıyn shyǵaratyn otandyq munaı óńdeýshi zaýyttardy qaıta qurylymdaýdaǵy Úkimet jobasyn qoldaıtyndyǵyn aıtady. «Elimizge ekologııalyq talaptarǵa jaýap bermeıtin eski kólikterdi kirgizbeý asa mańyzdy mindet bolyp tabylady. Osy tusta kólikter paıdalanatyn janar-jaǵarmaıdyń sapasy joǵary standarttarǵa sáıkes bolǵandyǵy abzal», - deıdi A.Sıdorov.
QABQ-nyń málimetinshe, Qazaqstan Munaı jáne gaz mınıstrligi jaqynda «QazMunaıGaz» Ulttyq kompanııasyna «Eýro-5» ekostandartyna sáıkes keletin janarmaı shyǵarýmen aınalysatyn úsh otandyq munaı óńdeýshi zaýytty jańǵyrtý boıynsha óz usynystaryn ázirleý jóninde tapsyrma bergen. QABQ ókilderi bul sheshimdi qoldaıtyndyqtaryn bildirýde.
«Astana-Motors» kompanııasynyń tehnıkalyq dırektory Andreı Beloýsov sapasyz benzındi paıdalaný nátıjesinde buzylatyn kepildendirilgen kólikterdi jóndeý orasan shyǵyn ákeletindigin aıtady. «Úkimettiń kóterip otyrǵan bul máselesin biz qoldaımyz, óıtkeni ol janar-jaǵarmaıdyń sapasyn kóterip qana qoımaı, ekologııamyzdyń da tazarýyna septigin tıgizedi», - deıdi Andreı Beloýsov.
