Janar maı naryǵynda tapshylyq joq - Energetıka mınıstrligi

ASTANA. QazAqparat - Janar-jaǵarmaı naryǵynda tapshylyq joq jáne dúrligýge negiz joq. Qazirgi tańda Qazaqstan boıynsha benzın qory - 100 myń tonna, dızeldi otyndar qory - 180 myń tonna. Elimizdegi úsh iri MÓZ-nyń barlyǵy JJM óndirýdi ulǵaıtýda, dep habarlaıdy QR Energetıka mınıstrliginiń baspasóz qyzmeti.

Aǵymdaǵy jylǵy qyrkúıek- qazan aılarynda jıyn-terin naýqanyny dızeldik otynmen qamtamasyz etý qajettiligine baılanysty «PetroKazahstan Oıl Prodakts» JShS (Shymkent MÓZ) kúrdeli jóndeý jumysy edáýir kesh merzimge aýystyryldy.

Atmosferalyq aýa temperatýrasynyń tómendiginiń saldarynan zaýyttyń josparly jumys rejımine shyǵýy ári qaraı jalǵasýda. Nátıjesinde Qazaqstannyń ońtústiginde, onyń ishinde Almaty jáne Almaty oblystarynda JJM jetkizýde kidirister boldy.

Qazir jaǵdaı rettelýde jáne jýyqta turaqty jetkizý jumysy qalypqa keltiriletin bolady.

«QR Energetıka mınıstrligi bekitken barlyq josparly jóndeý jumystary josparly-aldyn-alý jumystarynyń kestesinen 3 táýlik buryn, ıaǵnı  2016 jylǵy 9 qarashada aıaqtalǵandy.

Osy kezeńde: tehnologııalyq jabdyqtardy, qubyrlardy, óndiristik peshterdi, sorǵy-kompressorlyq túıinderdi, kabeldik jelilerdi, elektr jabdyqtardy, baqylaý-ólsheý-aspaptaryn jáne negizgi jáne kómekshi qurylǵylardyń avtomatıkasyn tehnıkalyq kýálandyrý jáne jóndeý júrgizildi.

Sonymen qatar kúrdeli jóndeý jumysy kezinde zaýytty jańǵyrtý jobasyn júzege asyrý baǵdarlamasy boıynsha jańa qubyrlardy jáne baılanystyrylǵan jabdyqtardy montajdaý, jańa tehnologııalyq jelilerdi bar qurylǵylarǵa kiriktirý jáne qosý júrgizildi», delingen habarlamada.