Janar Dúrmekbaeva: Muǵalimniń boıynda oqýshyǵa degen mahabbat bolýy kerek
- Áńgimemizdiń álqıssasyn týyp-ósken jerińizden bastasaq.
- Shyǵys Qazaqstan oblysy Abaı aýdany Sarjal aýylynda dúnıe esigin ashtym. Biraq ósken jerim – Qaraýyl. Sondaǵy Abaı atyndaǵy orta mektepte bilim aldyq. Sodan keıin Semeı shaharynda ornalasqan Krýpskaıa atyndaǵy pedagogıkalyq ınstıtýtqa fızmat fakýltetine tústim.
- Ustazdyq jolǵa qalaı keldińiz ?
- Ustazdyqtyń uly jolyna joldama alǵan kún ‒ men úshin umytylmaıtyn erekshe kúnderdiń biri. Sodan beri ýaqyt enshisine baǵynǵan ustazdyq eńbek jolymnyń otyz jyl kúz, qys, kóktem, jazy ótken eken. Eńbek adamdy ósiredi, kópti kórýge tárbıeleıdi jáne bıik belesterdi baǵyndyryp, alǵa qaraı jeteleıdi. Eńbegińniń jemisin kórip, marapatyn alýdyń ózi ‒ bir ǵanıbet. Men úshin eń úlken marapat ‒ shákirtterimniń kirshiksiz taza júrekterinen shyqqan alǵysy, qurmeti.
Degenmen qıyndyǵy men qyzyǵy qatar júretin uzaq jylǵy ustazdyq eńbegim nátıjesiz bolǵan joq. «Qazaqstan Respýblıkasy bilim berý isiniń Qurmetti qyzmetkeri» tósbelgisimen, «Bilim orkenieti» ulttyq ınnovatsııalyq ǵylymı-zertteý ortalyǵynyń «Qazaqstannyń bilim berý isiniń úzdigi» tósbelgisimen, túrli Qurmet gramotalarymen jáne Alǵys hattarmen marapattalyp, pedagog-sheber dárejesine kóterildim.
Ár isińdi nátıjege baǵyttap, josparly túrde oryndasań, jetistiktiń de jelkeni jelbirep, eńbegińniń aqtalary sózsiz. Sonyń aıǵaǵy retinde respýblıkanyń ár óńirinen kelgen pedagogterdiń ınnovatsııalyq áleýetin, zertteýshilik qabiletterin damyta otyryp, tájirıbe almasý maqsatynda ótken túrli konkýrstarǵa qatysyp, jeńimpaz atanyp, júldeli oryndarǵa ıe boldym.
- Matematıka pánin tańdaýyńyzǵa ne sebep boldy ?
- Bala kúnimen matematıkaǵa degen qulshynysym erekshe edi. Osy pánge qatty qyzyǵyp, sabaqty únemi kútip júretinmin. Mektep qabyrǵasynan túlep ushqannan keıin esh oılanbastan matematıkany tańdadym.
- Jetistikke jetken shákirtterińiz jaıly aıtyp berseńiz.
- Muǵalim jumysynyń jemisi – oqýshysynyń jetistigi. Al oqýshynyń jetistigi – bilimde. Bilimniń synalar shaǵy – oqýshynyń olımpıadalarǵa, saıystarǵa, ǵylymı-praktıkalyq konferentsııalar, ǵylymı jobalar men konkýrstarǵa qatysýy. Ótken oqý jylynda oqýshylarym Á.Maǵazbekov pen A.Temırhanova respýblıkalyq ǵylymı jobalar saıysynyń oblystyq kezeńinde І oryn, respýblıkalyq kezeńinde ІІІ oryn – qola medal, halyqaralyq kezeńde ІІ oryn – kúmis medal ıelendi. Jaratylystaný-matematıkalyq baǵyttaǵy pánderden ótken Prezıdenttik olımpıadanyń oblystyq kezeńinde 4 oqýshym І oryn, respýblıkalyq kezeńinde 2 oqýshym ІІІ oryn jeńimpazy atanyp, qola medal ıelendi.
Elimizdiń bolashaǵy – jastar. 30 jyldyq eńbek jolymda qanattaryn qataıtyp ushyrǵan qanshama shákirtterim búginde elimizdiń túkpir-túkpirinde ár salada el ıgiligi úshin eńbek etýde. Táýelsiz jas memleketimizdiń gúldenýi jolynda bolashaq urpaqtarymyz sanaly da saýatty bolýy shart, al osyndaı tulǵany qalyptastyratyn ‒ bizder, ıaǵnı ustazdar qaýymy. El bolashaǵynyń irgetasyn qalaıtyn jetkinshekterdi bilim nárimen sýsyndatyp júrgen ustaz bolǵanymdy maqtan tutamyn. «Ustazdyq etken jalyqpas, úıretýden balaǵa», ‒ dep Abaı aıtqandaı, áli de talaı shákirttiń sanasyna bilim dánin egip, bolashaq ómirlerine shýaq syılaǵym keledi.
- Ustaz úshin eń basty qasıet ne dep oılaısyz ?
- Eń aldymen muǵalimniń boıynda oqýshyǵa degen mahabbat bolýy kerek. Ustaz ben balanyń arasynda baılanys, aýyzbirshilik ornaýy tıis. Jaqsy pedagog oqýshynyń boıyndaǵy qabiletti, qasetti kóre bilýi qajet.
- Elimizde «Pedagog mártebesi týraly» zań qabyldanyp, muǵalimderge kóp kóńil bólinip jatqany belgili. Ózińizge sonyń nátıjesi qanshalyqty bilinýde ?
- Qazir ustazdyq mamandyqtyń mártebesi kóterildi. Osy salaǵa tartylyp jatqan jastardyń sany da artyp keledi. Zań qabyldanǵannan keıin muǵalimderdiń eńbegi baǵalanyp, artyq jumystan aryldy. Ózimiz de sonyń ıgiligin kórip jatyrmyz. QR Bilim jáne ǵylym mınıstri Ashat Aımaǵambetovtiń túrli bastamalary men jańashyldyqtaryn quptaımyn. Muǵalimderge kóp kóńil bólip jatqan Prezıdentimiz Qasym-Jomart Kemelulyna da rızashylyǵymdy bildiremin.
- Áńgimeńizge kóp rahmet!