Janar Doǵalova «Astana juldyzy-2015» mýzykalyq baıqaýynyń eki birdeı juldyzyn jeńip aldy (FOTO)
ASTANA. QazAqparat - Búgin Beıbitshilik jáne kelisim saraıynda elorda kúnine oraılastyrylǵan úshinshi «Astana juldyzy-2015» kásibı mýzykalyq baıqaýynyń saltanatty marapattaý rásimi bolyp ótti.
Baıqaýda 12 atalym boıynsha úzdikter anyqtaldy. Jeńimpazdarǵa altyn juldyz beınesindegi eskertkishter syıǵa tartyldy.
Daýys berý qorytyndysy boıynsha Aıqyn Tólepbergen men Janar Doǵalova «Astana juldyzy-2015» kásibı mýzykalyq baıqaýynyń eń úzdik er oryndaýshysy jáne eń úzdik áıel oryndaýshysy atalymdary boıynsha laýreat atandy. Sonymen qatar J. Doǵalova «Izin kórem» áni úshin «Jyl áni» atalymy boıynsha laýreat atandy.
Sondaı-aq, Arman Dúısenov úzdik kompozıtor, Qalqaman Sarın úzdik án mátinderiniń avtory, Pavel Lı úzdik árleýshi atandy.
«Úzdik dýet» ataǵyn Búrkit pen Aısha alsa, «Úzdik jeke kontsert» atalymy boıynsha Meırambek Besbaev jeńiske jetti.
«Qazaqstandyq mýzykanyń damýyna qosqan úlesi úshin» arnaıy syılyǵy Qaırat Baıbosynovqa, al «Mýzykalyq mádenıetke qosqan úlesi úshin» ataǵy marqum Batyrhan Shúkenovke berildi. Syılyqty ánshiniń uly Maqsut Shúkenov pen ártistiń dırektory Oljas Baıqanov aldy.
Sondaı-aq marapattalǵandardyń arasynda kompozıtorlar Beıbit Oraluly men Renat Ǵaısın de bar, olar qazaqstandyq ónerdiń damýyna qosqan úlesteri úshin arnaıy dıplomǵa ıe boldy.
