Jańaózenniń áleýmettik-ekonomıkalyq ósý qarqyny kóńilge qonymdy - QR Premer-Mınıstri
ASTANA. 7 jeltoqsan. QazAqparat - QR Premer- Mınıstri Serik Ahmetov Jańaózen qalasyn 2020 jylǵa deıin áleýmettik-ekonomıkalyq damytýdyń Keshendi josparyn júzege asyrý máseleleri boıynsha keńes ótkizdi, dep habarlaıdy Úkimet basshysynyń baspasóz qyzmeti.
Keńesti asha otyryp, Serik Ahmetov «Úkimet pen oblys ákimdigi Jańaózendi odan ári damytý boıynsha qajetti sharalardy iske asyryp otyrǵanyn» atap kórsetti.
«Bútindeı alǵanda, Jańaózenniń áleýmettik- ekonomıkalyq ósý qarqyny kóńilge qonymdy. Keshendi jospardy júzege asyrý sheńberinde 48 mlrd-tan astam teńge bólý josparlanyp otyr. Onyń 14,7 mlrd. teńgesi bıyl bólindi. Bul qarjyǵa turǵyn úıler, áleýmettik nysandar salynyp, qalanyń ınfroqurylymy damytylýda»,- dedi Úkimet basshysy.
Jańaózenniń álýmettik-ekonomıkalyq damýy týraly tolyǵyraq Mańǵystaý oblysynyń ákimi Baýyrjan Muhamedjanov baıandady.
Onyń sózine qaraǵanda, jospardy júzege asyrý negizinen áleýmettik sala, ınjenerlik ınfroqurylymdardyń qurylysy, halyqty jumyspen qamtamasyz etýge jumyldyrylǵan.
«Ústimizdegi jyly dárigerlik ambýlatorııa, kommýnaldyq úı salý jumysy aıaqtaldy. 95 páter áleýmettik jaǵynan az qamtylǵan azamattarǵa, 75 páter bıýdjettik sala qyzmetkerlerine berildi. Jyl aıaǵyna deıin 100 oryndyq perzenthana men eki balabaqsha paıdalanýǵa beriledi. Sonymen qatar, 2013 jyly qalalyq emhana men 3 orta mektep salynyp bolady.
Osylaısha Jańaózende 3 aýysymdyq oqý máselesi túbegeıli sheshiledi»,- dedi B. Muhamedjanov. Sondaı-aq, ol gazben qamtamasyz etý jelisin keńeıtý jáne qaıta jóndeý jumystary aıaqtalǵanyn, basty jylý qubyrlary almastyrylyp, qalanyń barlyq jylý júıesi jańartylǵanyn aıtty.
«Jyl basynan beri 6 myń adam eńbekke ornalastyryldy. Oblysta júzege asyp jatqan 11 iri ınvestıtsııalyq joba bastamashylarymen Jańaózen turǵyndaryn jumyspen qamtý týraly memarandýmǵa qol qoıyldy»,- dep habarlady, ákim.
Otyrys barysynda B.Muhamedjanov aımaqtyń áleýmettik-ekonomıkalyq deńgeıin jaqsartý boıynsha qolǵa alynyp jatqan is-sharalar týraly da habarlady.
Keńesti qortyndylaı kele, S.Ahmetov ortalyq jáne jergilikti atqarýshy organdar basshylaryna birqatar naqty tapsyrmalar berdi.
«Jańaózendi damytýǵa qatysty Memleket Basshysynyń tapsyrmasyn oryndaý boıynsha qosymsha sharalar qabyldaý kerek. Sondaı-aq, memlekettik-jekemenshik áriptestik tetikterin qoldana otyryp, shaǵyn jáne orta kásipkerlikti damytý úshin qolda bar rezervterdi barynsha iske qosý qajet. «Samuryq-Qazyna», «QazMunaıGaz»,«QazMunaıGaz BÓ» jańadan qurylǵan kásiporyndardy jumyspen qamtamasyz etýleri tıis»,- dedi Úkimet basshysy.
Sonymen qatar, Premer-Mınıstr «oblys pen qalada medıtsınalyq qyzmet kórsetýdi jaqsartý, qoǵamdyq kólikti uıymdastyrý jáne avtokólik joldary sapasyn arttyrý jóninde shuǵyl sharalar qoldaný týraly tapsyrma berdi».
«Bul ómirlik mańyzdy máseleler kezek kúttirmeı sheshilýi tıis»,- dep túıindedi S. Ahmetov.
