Jańaózenniń áleýmettik-ekonomıkalyq damýyna 6 mlrd teńge bólindi

ASTANA. QazAqparat - Jańaózen qalasynyń áleýmettik-ekonomıkalyq damý keshendi josparyn júzege asyrý úshin memleketten 6 mıllıard teńge bólindi. Bul jaıynda Mańǵystaý oblystyq Ekonomıka jáne bıýdjetti josparlaý basqarmasy basshysynyń mindetin atqarýshy Svetlana Nareshova málimdedi.

Onyń aıtýynsha, joǵaryda atalǵan 6 mlrd teńgeniń 3,1 mıllıardy respýblıkalyq bıýdjetten, 2,3 mıllıardy jergilikti bıýdjetten jáne 500 mıllıon teńgesi «Ózenmunaıgaz» AQ-nyń esebinen bólingen.

«Búgingi tańda ár qaısysy 320 orynǵa arnalǵan úsh balabaqshanyń qurylysy aıaqtaldy. Olardyń ekeýi Jańaózen qalasyndaǵy «Astana» jáne «Mereı» shaǵyn aýdandarynda. Al úshinshisi - Qyzylsaı aýylynda. Sonymen qatar, qorǵanys isteri jónindegi ǵımarat, «Mamyr» aýdanynyń avtomobıl joldarynyń qurylysy da aıaqtaldy. Mańǵystaý kóshesindegi jaryqtandyrý júıesiniń rekonstrýktsııasy, 5 sporttyq nysannyń qurylysy, saýda oıyn-saýyq ortalyǵynyń ǵımaraty da salynyp bitti. Sondaı-aq «Araı» shaǵyn aýdanynda 320 orynǵa arnalǵan balabaqshanyń qurylysy, ortalyq jylytý qazandyǵyn rekonstrýktsııalaý jáne keńeıtý jumystary, «Juldyz» ben «Mereı» shaǵyn aýdandaryna sý taratý jelisin ornatý jumystary, ózen sýyn aýyz sýǵa aınaldyratyn qondyrǵylardy ornatý jumystary, qalanyń elektr jelisin rekonstrýktsııalaý jumystary, 50 orynǵa arnalǵan emhananyń qurylysy, 5 aýla alańqaıynyń qurylysy, qalalyq aýrýhananyń terapııalyq korpýsynyń qurylysy, uzyndyǵy 2,2 shaqyrym «Kendirli» demalys aımaǵyna baratyn avtomobıl jolynyń qurylysy qarqyndy túrde júrip jatyr», - dedi S.Nareshova.

Monoqalalardy damytý baǵdarlamasyn júzege asyrý maqsatynda bıyl Jańaózen qalasyna taǵy da 1,1 mlrd teńge bólingen. Bul qarajat ekonomıkany ártaraptandyrýǵa, shaǵyn jáne orta bıznesti damytýǵa, ınjenerlik ınfraqurylymdy damytýǵa baǵyttalǵan.

«Jańa óndiristi qalyptastyrý úshin 21 mıllıon teńgege 7 grant berildi, 605,9 mıllıon teńgege 15 joba sýbsıdııalandy. 9,5 mıllıon teńgege 6 joba kepildendirildi. Óndiris alańyna deıin baratyn joldyń qurylysy aıaqtaldy. Jańaózen qalasyndaǵy «Shańyraq» shaǵynaýdanynyń aýlaishilik joldary jóndeýden ótti», - dep málimdedi basqarma basshysynyń mindetin atqarýshy. «Jumyspen qamtýdyń jol kartasy-2020» bańdarlamasynyń birinshi baǵyty - «Infraqurylym men TKSh-ny damytý arqyly jumyspen qamtamasyz etý» boıynsha 2015 jylǵa 474 mıllıon teńge bólingen. Nátıjesinde josparlanǵan 44 jobanyń 40-y aıaqtalyp, 389,4 mıllıon teńge ıgerildi jáne 261 jańa jumys orny quryldy.