Jańaózennen Túrikmenstan shekarasyna deıingi jol júrý ýaqyty 2,5 saǵatqa deıin qysqarady
ASTANA. KAZINFORM – Mańǵystaý oblysynda «Jetibaı – Jańaózen – Kendirli – Túrikmenstan Respýblıkasynyń shekarasy» respýblıkalyq mańyzy bar avtomobıl jolynyń 179-229 shaqyrym aralyǵynda kúrdeli jóndeý jumystary júrip jatyr, dep habarlaıdy «QazAvtoJol» ulttyq kompanııasy.
Jalpy uzyndyǵy 50 shaqyrym bolatyn bul ýchaske halyqaralyq tranzıttik baǵyttyń mańyzdy bóligi sanalady.
Joba joldyń tehnıkalyq jaǵdaıyn jaqsartýmen qatar, Qazaqstannyń Túrikmenstan jáne Iran baǵytyndaǵy tranzıttik áleýetin arttyrýǵa, Kendirli kýrorttyq aımaǵynyń kólik qoljetimdiligin jaqsartýǵa baǵyttalǵan.
Qazirgi ýaqytta 50 shaqyrymda jer jumystary oryndalyp, geotekstıl jáne S4 qıyrshyq tas pen qum qospasy tóselgen. Sondaı-aq 47,5 shaqyrymda qara qıyrshyqtastan joǵarǵy negiz qabaty, 38 shaqyrymda iri túıirshikti asfaltbeton jamylǵysy tóseldi.
– Buǵan deıin Jańaózennen Túrikmenstan shekarasyna deıingi kúrdeli ýchaskeden ótýge tranzıttik kólikke orta eseppen 7 saǵatqa deıin ýaqyt ketse, jóndeý aıaqtalǵannan keıin jol júrý ýaqyty shamamen 2-2,5 saǵatqa deıin qysqarady, – delingen habarlamada.
Jol jabynynyń jańa konstrýktsııasy jalpy qalyńdyǵy 45 santımetr bolatyn kúrdeli úlgidegi jabynnan turady.
Sonymen qatar «Temir-Baba» ótkizý pýnktiniń beıtarap aımaǵyndaǵy 1,8 shaqyrymdyq ýchaskede jer jumystary aıaqtalyp, geotekstıl, qıyrshyqtas-qum qospasy, qara qıyrshyqtas jáne asfaltbeton qabattary tóselgen.
Joldy jańǵyrtý nátıjesinde qozǵalys qaýipsizdigi men jaılylyǵy artyp, baǵyttyń ótkizý qabileti jaqsarady dep josparlanyp otyr. Sondaı-aq joba Qazaqstannyń halyqaralyq kólik dálizderindegi tranzıttik múmkindikterin keńeıtip, Mańǵystaý óńiriniń kólik-logıstıkalyq jáne týrıstik áleýetin damytýǵa baǵyttalǵan.
Aıta keteıik, buǵan deıin osy joldyń 50 shaqyrymdyq ýchaskesindegi jóndeý jumystarynyń barysy jáne jańartylǵan jol Jańaózennen Túrikmenstan shekarasyna deıingi jol júrý ýaqytyn edáýir qysqartatyny habarlanǵan bolatyn.
