Jańaózendik sýretshi ushqysh atandy: Djohar ıÝnýsov Airbus A320 tizgindedi

— Djohar, birneshe jyl buryn siz Jańaózende mýral salyp júrip, ushqysh bolý armanyńyz týraly vıdeo túsirgen edińiz. Ushqysh bolamyn degen oı sizde qashan paıda boldy?

— Shynymdy aıtsam, ushqysh bolý bala kezimnen kele jatqan arman edi. Ásirese kolledjdi aıaqtaǵannan keıin avıatsııa salasyna túsip, azamattyq avıatsııa ushqyshy bolǵym keldi. Biraq ómirdiń óz jospary bolady ǵoı. Sýret salýmen aınalysyp, mýraldar jasaı bastadym. Bul da maǵan unaıtyn is boldy.

2022 jyly kezekti mýraldy istep júrip, sol armanymdy taǵy bir ret eske aldym. Sol kezde «nege baıqap kórmeske?» degen oı keldi. 29 jeltoqsanda Air Astana-nyń Ab-initio baǵdarlamasyna ótinish beretinimdi aıtyp, vıdeo túsirdim. Sol sátte bul men úshin úlken qadam boldy.

— Baǵdarlamaǵa daıyndyq qalaı ótti?

— Ońaı bolǵan joq. Eń aldymen aǵylshyn tilimdi jaqsartýym kerek boldy. Shamamen jeti aı daıyndalyp, IELTS-ten 6.0 ball jınadym. Odan keıin matematıka men fızıkany qaıta oqýǵa týra keldi.

Mektep baǵdarlamasyndaǵy pánderdi qaıta qarap shyǵý bir bólek, avıatsııaǵa baılanysty bilimdi meńgerý taǵy bir bólek. Sondyqtan daıyndyq kezeńinde ózime kóp talap qoıdym.

— Keıin Irlandııaǵa oqýǵa bardyńyz. Bul kezeń qalaı ótti?

— Irlandııaǵa barǵannan keıin oqý qarqyny múlde basqa boldy. Ol jerde kásibı daıyndyq bastaldy. Teorııalyq bilimmen qatar, ushýǵa qatysty kóptegen jańa dúnıeni úırendik.

Buǵan deıin sýret salyp, shyǵarmashylyqpen aınalysqan adam retinde avıatsııadaǵy tártip pen jaýapkershilikke beıimdelý de mańyzdy boldy. Ushqysh mamandyǵynda usaq-túıekke oryn joq. Árbir áreket naqty ári muqııat oryndalýy kerek.

— Sonda sýret salýdy tolyq tastap kettińiz be?

— Joq. Sýret salý men úshin áli de mańyzdy. Men muny bir mamandyqty ekinshisine aýystyrý dep qabyldamaımyn. Kerisinshe, ómirimniń ár kezeńinde ózime mańyzdy dúnıelerdi alyp júrdim. Sýret salý maǵan shyǵarmashylyq oılaýdy úıretse, avıatsııa tártip pen jaýapkershilikti talap etedi.

— 2026 jyldyń tamyzynda Airbus A320 ushaǵyndaǵy alǵashqy derbes ushýyńyzdy oryndadyńyz. Sol sátte qandaı sezimde boldyńyz?

— Bul erekshe sezim boldy. 2022 jyly men áli Jańaózende mýraldyń ústinde turyp, «ushqysh bolǵym keledi» dep aıtyp júrgen edim. Al 2026 jyldyń 12 tamyzynda Airbus A320 ushaǵyna alǵashqy ret ózim ushqysh retinde otyrdym. Ushaqqa qaraı júrip bara jatqanda birneshe jyl burynǵy ózim túsirgen vıdeom esime tústi. Sol kezde bul kúndi tek elestetetinmin. Al endi armanymnyń alǵashqy naqty nátıjesin kórdim.

Bul — ómirińdegi alǵashqy derbes ushý. Biraq daıyndyqtyń arqasynda ózińe degen senim paıda bolady. Ushqysh úshin eń mańyzdysy — emotsııaǵa berilmeı, alǵan bilimi men daıyndyǵyna súıený. Alǵashqy ushýdan keıin «bul tek bastamasy» degen oı keldi. Sebebi alda áli de úırenetin nárse kóp.

— Úsh jarym jyl burynǵy Djohar men qazirgi Djohardyń aıyrmashylyǵy qandaı?

— Úsh jarym jyl buryn men armanyma qaraı alǵashqy qadamdy endi ǵana jasap jatqan edim. Sol kezde nátıje qandaı bolatynyn bilmedim. Tek tyrysyp kórýdi sheshtim.

Qazir sol sheshimniń durys bolǵanyn túsindim. Biraq bul joldyń aıaqtalǵanyn bildirmeıdi. Kerisinshe, endi jańa kezeń bastaldy.

— Ózińiz sııaqty armanyna jetýge talpynyp júrgen jastarǵa ne aıtar edińiz?

— Eń bastysy — armanyńdy keıinge qaldyrmaý. Keıde adam ózine «qazir ýaqyty emes», «qolymnan kelmeıdi» dep syltaý aıtady. Menińshe, eń mańyzdysy — alǵashqy qadamdy jasaý. Biraq naqty maqsat qoıyp, daıyndalyp, eńbektenseń, oǵan jetýge bolady.

Men úshin bul — qylqalamnan shtýrvalǵa deıingi jol. Ekeýi eki túrli álem sııaqty kóringenimen, ekeýiniń de túbinde óz isińe degen jaýapkershilik pen súıispenshilik jatyr.

Buǵan deıin, «Kásipte eń mańyzdysy — tabandylyq»: mańǵystaýlyq jas kásipkermen suhbat jazǵan bolatynbyz.