Jańaózendik fotograf qaraqutandardyń uıa salǵanyn taspalady
AQTAÝ. KAZINFORM – Qaraqutan (baklan) Mańǵystaýda mekendeıdi. Olardyń ereksheligi – uıasyn ashyq aspan astynda, qaz-qatar tizip, bir jerge shoǵyrlandyryp salady. Osy kórinisti beınejazbaǵa túsirgen fotograf Baqytjan Jumaǵalıuly Kazinform tilshisimen kásibiniń qyr-syrymen bólisti.
Baqytjan Jumaǵalıuly – áýesqoı fotograf. Jańaózen qalasynyń turǵyny. 15 jyldan beri osy salada jumys istep keledi. Al Mańǵystaýdyń kórkem tabıǵatyn, ań-qustaryn foto-vıdeoǵa túsirip, áleýmettik jelige júkteı bastaǵana 1 jyldaı bolǵan.
- Bul túsirilimder arqyly Mańǵystaýdyń tabıǵaty men jan-janýarlaryn nasıhattap qana qoımaı, halyqty tabıǵatty qorǵaýǵa, qorshaǵan ortaǵa janashyrlyqpen qarap, qurmetteýge shaqyrǵym keledi, - deıdi fotograf.
Ol qaraqutandar mekendeıtin aýmaqqa jetý úshin uzaq jol júrgenin aıtady. Jetken soń qanattylardy úrkitip almaý úshin alystan ǵana túsiripti.
- Qaraqutandardy túsirý úshin Aqtaý qalasynan tańǵy 05:00 shyǵyp, Kendirli demalys ornyna saǵat 08:00 jettik. Ary qaraı qaıyqpen qaraqutan mekendeıtin jerge jettik. Túsirilimge 1 saǵattaı ýaqyt jumsadym. Qustardy úrkitpeý maqsatynda qashyqtan túsirip keri qaıttyq, - deıdi fotograf.
Baqytjan Jumaǵalıuly buǵan deıin taý-tasqa uıa salǵan qaraqutandardy beınejazbaǵa túsirgen. Bul joly jerde qaz-qatar tizilgen uıalardy kórip qatty tańǵalǵan. ıAǵnı, qaraqutandaı eki túrli uıa salady.
- Mańǵystaý oblysynda qaraqutandar jappaı uıa salyp, balapan órgizý kezeńine kiristi. Bul qustardyń ereksheligi - uıalaryn ashyq dalada, shóptiń ústine qaz-qatar tizip, erekshe shoǵyrlanǵan túrde ornalastyrady. Qaraqutandardyń uıa salý úlgisi qoldan qoıǵandaı kórinedi. ıAǵnı, birdeı araqashyqtyq pen rettelgen tártip bar. Mundaı kórinis Qazaqstanda óte sırek kezdesedi. Mamandardyń aıtýynsha, Mańǵystaý – baklan qustarynyń eń kóp shoǵyrlanǵan aımaqtarynyń biri, - deıdi Baqytjan Jumaǵalıuly.
Fotograftyń qaraqutandar týraly beınejazbasy áleýmettik jelilerde keńinen taralyp jatyr.
Áýesqoı fotograf buǵan deıin baıǵyz, qaramoınaq felıp, qutan, aqqý qustaryn taspalaǵan. Mańǵaz Mańǵystaýdyń tórt túligin de erekshe qyrynan túsirip júr.
- Osy kásibimniń arqasynda Mańǵystaýdyń erekshe jerlerin kórdim. Sulý tabıǵaty árdaıym tańǵaldyrady. Onyń taý-tasyn, ań-qusyn erekshe qurmetteımin, - deıdi Baqytjan Jumaǵalıuly.
Buǵan deıin, Mańǵystaýda Bozjyra shatqalyna sheteldik ınvestor qonaqúı salýǵa nıet bildirgeni týraly jazǵan bolatynbyz.