Jańaózendikter saılaýdy talapqa saı ótkizý úshin qosymsha qarjy surady - OSK
ASTANA. 23 jeltoqsan. QazAqparat /Aıdar Ospanalıev/- Mańǵystaý oblystyq saılaý komıssııasynyń ókilderi Jańaózen qalasynyń saılaý komıssııasy úshin Ortalyq saılaý komıssııasynan qarjylaı qoldaý kórsetýdi surady.
Bul týraly búgin Ortalyq saılaý komıssııasynyń kezekti otyrysynda atalmysh komıssııa tóraǵasy Qýandyq Turǵanqulov málim etti.
Onyń sózine qaraǵanda, mańǵystaýlyqtar Jańaózende tótenshe jaǵdaıdyń jarııalanýyna baılanysty onda túrli jıyndar men mıtıngiler ótkizýge shekteý qoıylǵandyǵyn aıtýda. «Osyǵan baılanysty ondaǵy kandıdattarǵa teledıdardaǵy jáne baspasóz basylymdaryndaǵy úgit-nasıhat jumystaryna kóbirek kóńil bolý kerek bolyp otyr. Menińshe, biz bul ótinishti qanaǵattandyra alamyz. Qazirgi tańda Ortalyq saılaý komıssııasynyń rezervinde oǵan qajetti qarjy bar. Sondyqtan biz Jańaózende de úgit-nasıhat jumystary keń kólemde jáne talapqa saı ótýi úshin qoldan kelgenniń barlyǵyn júzege asyramyz»,-dedi OSK tóraǵasy.
