Jańaózendikter Qazaq memlekettik akademııalyq balalar men jasóspirimder teatrynyń ónerin tamashalaıdy
ALMATY. 6 qarasha. QazAqparat - Almatydaǵy Ǵabıt Músirepov atyndaǵy Qazaq memlekettik akademııalyq balalar men jasóspirimder teatry 19-23 qarasha kúnderi Jańaózen qalasyna gastroldik saparmen barady.
Qala turǵyndary men qonaqtary almatylyq óner ujymynyń qoıylymdaryn «Munaıshy» mádenıet saraıynda tamashalaıtyn bolady. Olardyń arasynda Sh. Aıtmatovtyń «Qyzyl oramaldy shynarym» dramasy, S. Ahmadtyń «Kelinder kóterilisi» komedııasy, S. Smataevtyń «Kógildir taksı» melodramasy, E.Hýshvaqtovtyń «Súıe bilseń...» lırıkalyq komedııasy men T. Temenovtyń «Karmensıta» dep atalatyn «Karmen» povesine fantazııasy jáne Ó.Boranbaevatyń balalarǵa arnalǵan «Er kójek» mýzykalyq ertegisi qoıylady.
Buǵan deıin óner ujymy 21-27 qazan kúnderi Almatyda ótken Ortalyq Azııa memleketteriniń IV halyqaralyq teatr festıvaline qatysqan bolatyn. Onda Lıtvanyń Memlekettik syılyǵynyń laýreaty, Lıtva orys drama teatrynyń kórkemdik jetekshisi Ionas Vaıtkýs bastaǵan qazylar alqasy «Karmensıta» qoıylymynan Janar Maqashevany «Úzdik áıel róli» atalymy boıynsha, al Erlan Tuıaqovty «Úzdik stsenografııa» atalymy boıynsha ozyq dep tanyǵan edi.
