Jańaózendik jastar qazaqstandyqtarǵa estafeta joldady

AQTAÝ. QazAqparat - Jańaózendik jastar «Jaqsylyq jasa» chellendji aıasynda ıgi is bastady. Olar qala kóshelerine túrli naqyl sózder jazylǵan taqtaıshalar ornatty, dep habarlaıdy QazAqparat tilshisi.

«Birligi myqty jastar - bolashaqqa jol bastar», «Ár qazaq - meniń jalǵyzym». Bul - taqtaıshaǵa jazylǵan ǵıbratty maqaldar, zerdege qonar túıindi naqyldar. Osyndaı rýh pen jiger beretin sózder endi ár kóshede ilinip turady.

«Jańaózen jastary halyqty birlikke, yntymaqqa, syılastyqqa, adamgershilikke shaqyratyn naqyl sózderdi jazyp, ilip qoıdy. Bıyl Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynyń jarııalanǵanyna 2 jyl toldy. Sondyqtan, kreatıvti 20 taqtaısha jasap berdik»,- deıdi jobaǵa muryndyq bolǵan Orynbasar Seıtov.

«Taqtaıshalardyń tárbıelik máninen bólek, qalanyń sánin keltiredi» deıdi jastar. Sondyqtan qolǵa alynǵan ıgi isti basqa óńirlerge joldady.

«Búkil qazaqstandyqtardy osyndaı taqta ornatýǵa shaqyramyz»,- deıdi Jańaózen turǵyny Ýálıhan Bısenqulov.

Jastar aldaǵy ýaqytta az qamtylǵan otbasylar úshin qaıyrymdylyq sharalaryn uıymdastyrmaq. Azyq-túlik pen qarjylaı kómek kórsetýdi josparlap otyr. Osyǵan deıin 1 mln teńgege muqtaj jandarǵa pandýs ornatyp bergen. Olardyń aıtýynsha, mundaı sharalar jastardy jaqsylyq jasaýǵa, meıirimdi bolýǵa baýlıdy.