Jańaózendik jastar esirtkige qarsy qysqametrajdy fılm túsirdi
Rejısser Azamat Artyqov pen prodıýser Aqıqat Sharapatdın birlesip túsirgen fılm sıntetıkalyq esirtki saldary jóninde baıandaıdy.
«Búgingi qoǵamdaǵy óte ótkir másele - sıntetıkalyq esirtkige elitken jastar. Bizdiń fılm úsh maqsatty kózdeıdi. Fılmdi kórgen jastar ómirin oń ózgeristerge baǵyttasa deımiz, ekinshiden ata-analar aqparat alady. Sondaı-aq osy fılm arqyly jańaózendik jastar otandyq medıa salasynyń damýyna ózindik úlesin qosady. Kınoda jergilikti akterlar Aıap Asyltas, Arman Jemeneı oınaıdy. Kınoda úlken qalaǵa oqýǵa túsken keıipkerdiń zııandy ádetterge úıir bolýy jáne bul dúnıelerdiń onyń ómirine áseri sıpattalady. Biz bul taqyrypty jaqsy zerttedik», - deıdi Aqıqat Sharapatdın.
Basty rólderdiń birin jıyrma jastaǵy Mıras Chanov Maqsat esimdi stýdenttiń rólin somdaıdy. Mıras bul óziniń túsken alǵashqy týyndysy bolǵandyqtan birqatar qıyndyqqa tap bolǵanyn aıtady.
«Bul fılmnen úlken tájirıbe jınadym. Negizgi mamandyǵym órt sóndirýshi bolǵandyqtan fılmge túsý ońaıǵa soqpady. Men kınoda túngi oıyn-saýyq keshenderine baryp, esirtki qoldanatyn stýdenttiń rólin somdadym. Al shyn ómirde tipti shylym shegip kórmegendikten, dýbldardy qaıta-qaıta túsirdik. Bul fılm arqyly jastardy salaýatty ómir saltyn ustanyp, óz ómirin baǵalaýǵa shaqyramyn», - dedi Mıras Chanov.
