Jańaózendik tárbıeshi erekshe qajettilikteri bar balalarǵa kómektesýde

JAŃAÓZEN. QazAqparat - Teńge aýylynyń balabaqsha tárbıeshileri múgedek balalarǵa qamqorlyq tanytýda. Bar ynta-jigerin bala tárbıesine arnap júrgen olar «Teńge» bóbekjaı baqshasynda eńbek etedi.

«Otbasylyq tárbıeshi» jobasy búginde keńinen qoldanys tabýda. Biz osyndaı balabaqsha tárbıeshileriniń biri Mádına Shamýradovamen suhbattastyq.

- Osyndaı ortalyq qurý ıdeıasy qalaı týdy?

- Ózimiz kúnde balalarmen jumys isteımiz. Olarǵa tálim-tárbıe berip, boıyna jaqsy qasıetterdi sińirip, oń men solyń tanytýǵa tyrysamyz. Sonda osynyń bárinen tys qalyp júrgen balalar da bar ǵoı dep oıladyq. Áriptesterimmen olarǵa da qol ushyn sozaıyq dep sheshtik.

- Zhas Project jobasy jaıly qaıdan bildińiz?

- Bizdiń balabaqsha meńgerýshimiz elimizde Zhas Project jobasy júzege asyrylyp jatqanyn, oǵan bizdiń de qatysa alatynymyzdy aıtty. Sonda biz sal aýrýyna shaldyqqan, jalpy, múgedek balalarǵa kómektesý maqsatynda tıisti jobany ázirleı bastadyq. Qarajat ýaqytyly bólindi. Sodan keıin jergilikti ákimdikten múgedek balalardyń tizimin alyp, ata-analarmen baılanysqa shyqtyq. Olar bizdiń usynysymyzdy qýana qabyldady. Bólingen qarjyny oqý barysynda qajet bolatyn jabdyqtarǵa jumsadyq. Mysaly, oqý quraldaryn, oıynshyqtar satyp aldyq. Sonymen qatar, balalardyń densaýlyǵyn jaqsartý úshin massaj jasaıtyn arnaıy kilemshemiz de bar. Aldaǵy ýaqytta túrli tústi prınter, balalarǵa syılyqtar alýdy oılastyryp júrmiz.

- Komandańyz jaıly aıtyp ótip, jobany júzege asyrý barysyna toqtalsańyz.

- Joba úsh aıdan beri júzege asyrylyp keledi. Slýv Klycheva, Qundyz Imanbaeva jáne men aptasyna eki ret balalardy úılerine baryp oqytamyz, olarmen túrli oıyndar oınap, kóńilderin kóteremiz. Qazirgi kezde qamqorlyǵymyzǵa 9 balany aldyq. Búginde olardyń damýynda ilgerileý baıqalady. Oqytý barysynda ıntellektýaldy damytý, Montessorrı ádisterin qoldanamyz.

- Jobanyń áleýmettik mańyzdylyǵy nede? Kimge kómektesesizder?

- Jobamyz múgedek balalardy tárbıelep otyrǵan otbasylarǵa kómektesýge baǵyttalǵan. Balalar bizge úırenip qaldy, aldymyzdan shyǵyp, qarsy alady, tipti, qolyna qalam ustaı almaıtyn balalar qazir sony da úırendi. Ata-analar da máz, olar sharýalaryn jasap úlgeredi. Negizinen, bul – 5-6 jastaǵy balalar. Damýynda aýytqýy bar, qulaǵy estimeıtin nemese júre almaıtyn balalar. Olarǵa barlyǵyn oıyn túsindirip, keıin tapsyrmalar beremiz.

- Ortalyq qaıda ornalasqan?

- Ortalyqtyń arnaıy ǵımaraty joq. Biz ár balanyń úıine baramyz. Onymen óz úıinde, úırenshikti ortada kezdesemiz. Al, baılanys nomeri 8747 457 06 45.

- Bolashaqqa josparlaryńyz qandaı?

- Aldaǵy ýaqytta múgedek emes, damýynda aqaýy bar balalarǵa arnalǵan ortalyq ashýdy josparlap otyrmyz. Olarmen ıntellektýaldy oıyndar oınap, kúndelikti sabaq ótkizbekpiz. Basty maqsatymyz -osyndaı erekshe balalarǵa barynsha kóńil bólip, bizben qatarly jan ekenderin sezindirý, ata-analarǵa qoldaý kórsetý.

- Qalaı oılaısyz Zhas Project jobasynyń mańyzdylyǵy nede? Artyqshylyǵy bar ma?

- Jastar jyly aıasynda óńirimizde iske asyrylyp jatqan Zhas Project jobasynyń paıdasy zor. Ol arqyly jastar múgedek, jaǵdaıy tómen otbasylarǵa kómektese alady, jańa jumys oryndary ashylady, bıznesti damytýǵa qolǵabys alyp, qoldaý tabady . Qazirgi kezde, jalpy, jumys tabý qıyn ǵoı. Al, Zhas Project jobasy jastarǵa jańa múmkindikterge jol ashady. Osyndaı jobany ázirlep, iske asyrǵan uıymdastyrýshylarǵa alǵys bildiremiz.

Zhas Project jobasy týraly tolyq aqparat.