Jańaózendik massajıst: Ómirge degen qushtarlyǵy kemip, del-sal kúı keshken jandarǵa kómegimdi aıamaımyn
Lıýdmıla Bashkenova - 1-toptaǵy múgedek. Taǵdyr tálkegine moıymaǵan massajıst qımyl-qozǵalysy shekteýli ekendigine qaramastan erik-jigeriniń arqasynda kúızeliske dýshar bolǵan jandarǵa kómek qolyn sozyp keledi.
Myqty áıel óz jumysy jaıly erekshe yqylaspen baıandaıdy. Sebebi, ol keı adamdardyń dertinen aıyǵyp, aıaǵynan tik turýyna yqpaldasyp, jańa bir beleske bıikteýine septesken.
«Qandaı jumys bolsa da, árdaıym shyn nıetimmen jasap, kásibimdi damytyp kelemin. Kúızeliske túsip, jaǵymsyz oıǵa shyrmalǵan, kúsh-qýaty, ómirge degen qushtarlyǵy kemip, del-sal kúı keshken jandarǵa kómegimdi aıamaımyn. Massaj arqyly izgilik pen jaqsylyqqa degen qulshynysty qaıta oıatyp, senimin bekitýge septesemin» - dedi Lıýdmıla Bashkenova.
Lıýdmıla keı adamdar sekildi munaı salasynan da jumys izdeýdi josparlaǵan. Alaıda kúrdeli saladaǵy qyzmetti kóńili qalamaǵan.
«Munaı salasyndaǵy qyzmet bárine birdeı buıyra bermesi anyq. Sebebi bul salada kásibı bilikti óz isiniń mamandary ǵana jumys isteýi tıis. Іrkilissiz óndiristi iske asyrýda quryshtaı berik, densaýlyǵy myqty mamandar ter tógýde. Sondyqtan barshaǵa ortaq talapty eskerý mindet tur. Al meniń jaǵdaıymda densaýlyǵymnyń dimkástigine baılanysty qoǵam ómirine oń ózgerister ákelýde naqty múmkindigimdi saraladym. Súıikti isińdi tabý úshin qandaı mamandyq alǵanyń mańyzdy emes. Tipti, múmkindigińiz shekteýli bolsa da belgili bir salany damyta alasyz. Eń bastysy - qasań qaǵıdattarǵa boı aldyrmaı, óz qalaýyńmen ómir súrý», - deıdi Jańaózen turǵyny.
Lıýdmıla Bashkenova massaj isine bet burmas buryn, qolónermen aınalysqan. Búldirshinderge arnalǵan ár alýan kıimder toqyp, saýdalaǵan. Eńbek etýden esh jalyqpaǵan jan mańdaı termen tapqan nan tátti ekenin aıtady.
