Jańaózendegi jumysqa ornalastyrý komıssııasy bir aıdan beri ne tyndyrdy

JAŃAÓZEN. QazAqparat - 8 aqpannan bastap Mańǵystaý oblysy ákiminiń birinshi orynbasary Abzal Meńdibaevtyń basshylyǵymen Jańaózen qalasynda halyqty jumyspen qamtý máselelerin sheshý úshin óńir basshysynyń tapsyrmasymen qurylǵan oblystyq komıssııasy jumys isteıdi, dep habarlaıdy QazAqparat.

Komıssııa músheleri qalanyń áleýmettik-ekonomıkalyq damýyna baǵyttalǵan keshendi damý josparyn negizge ala otyryp, Mańǵystaý oblysyndaǵy shaǵyn jáne orta bıznes sýbektileriniń áleýetin, eńbek naryǵyn jan-jaqty zerdeledi.

- Bul baǵyttaǵy jumys jalǵasyp jatyr. Halyqqa óńirdiń barlyq turǵyndaryn munaı-gaz salasyna jumysqa ornalastyrý múmkin emestigin túsiný qajet. Men arandatýǵa boı aldyrmaýǵa jáne zańsyz áreketter jasamaýǵa shaqyramyn, - dedi Mańǵystaý oblysy ákiminiń birinshi orynbasary Abzal Meńdibaev.

Komıssııa jumysynyń qorytyndysy boıynsha, bıyl Jańaózen qalasynda 2570 adamdy jumysqa ornalastyrý josparlanýda.

Onyń 1434 turaqty jumys orny, al 1136 ýaqytsha jumyspen qamtylady.

Atap aıtsaq:

- Qalalyq jumyspen qamtý ortalyǵynan 5 sanat boıynsha kezekte turǵan 682 adam munaı-gaz salasyna jumysqa ornalasýdyń qoldanystaǵy algorıtmi boıynsha jumysqa qabyldanady. Komıssııa jumysy bastalǵan sátten bastap, 682 adamnyń 150-i jumysqa ornalasýda.

- «Ózenmunaıgaz» AQ servıstik qyzmet kórsetý mekemelerinde halyqtyń áleýmettik osal toptaryna jatatyn, halyqtyq baqylaý toby men jumyspen qamtý jáne áleýmettik baǵdarlamalar bólimi janyndaǵy Jumys komıssııasynyń usynymdaryna sáıkes qurylǵan 318 jumys ornyna tańdalǵan azamattardy jumysqa ornalastyrý kózdeledi. Onyń 300-i jumysqa ornalasý ústinde.

Keshendi damý jospary aıasynda qalalyq, kentishilik avtomobıl joldaryn jóndeý, Teńge aýylynda dene shynyqtyrý-saýyqtyrý kesheniniń qurylysy, Teńge aýylyna deıin sý qubyryn tartý jáne t.b. jumystar isteledi.

Sondaı-aq jalaqysy 150 myń teńgeden bastalatyn 155 jumyssyz azamatty jumysqa ornalastyrý josparlanyp otyr.

«Jumys jasaıtyn» jobasy aıasynda 400 jumys orny ashylady.

Budan basqa jeke kásipkerler esebinen 390 jumys orny qurylady. Bul bos jumys oryndarynyń jalaqysy 150 myń teńgeden bastalady.

Qala turǵyndary úshin jańa jumys oryndaryn ashý sharalary kezeń-kezeńmen iske asady.