Jańaózendegi jol apatynan japa shekkenderge 20 mln teńge bólinedi
ALMATY. QazAqparat - Mańǵystaý oblysy Jańaózen qalasynda teplovoz ben «Gazeldiń» soqtyǵysýy saldarynan qaza bolǵandar men zardap shekkenderdiń otbasylaryna qarjylaı kómek kórsetiledi. Mundaı tapsyrmany búgin apparattyq keńeste aımaq basshysy Eraly Toǵjanov júktedi, dep habarlaıdy QazAqparat tilshisi.
Jol apaty 25 qarasha kúni Jańaózen mańyndaǵy Teńge eldi mekeninde boldy. Teplovoz ben «Gazeldiń» soqtyǵysýy saldarynan 9 adam ajal qushyp, 27-si jaraqattandy.
Oblys ákimdiginiń baspasóz qyzmetinen málim etkendeı, kólik oqıǵasynda zardap shekkenderge kómek kórsetý úshin barlyǵy 20 mln teńge bólinedi. Atap aıtqanda, qaza bolǵandardyń otbasylaryna - 1 mln teńgeden, aýyr halde jatqan 9 adamǵa - 500 myń teńgeden, japa shekken 18 adamǵa 300 myń teńgeden beriledi.
Sonymen birge apparattyq keńes barysynda oblystaǵy barlyq memlekettik organdar qyzmetkerleriniń birkúndik jalaqysyn jol apatynan zardap shekkenderdiń otbasylaryna aýdarý týraly sheshim qabyldandy.
Aıta keteıik, atalmysh jol apatyna baılanysty Jańaózen qalasynyń ákimdigi janynan 15 adamnan turatyn komıssııa quryldy. Olar kóz jumǵan jáne jaralanǵan otbasylarǵa kómek kórsetý máselelerimen aınalysady.
Sondaı-aq materıaldyq kómek kórsetý úshin qaıyrymdylyq qory quryldy. Komıssııa men qaıyrymdylyq qorynyń jumys barysyn oblys ákimi Eraly Toǵjanov tikeleı qadaǵalaıtyn bolady.
