Jańaózendegi jol apatynan 9 adam zardap shekti
AQTAÝ. QazAqparat - Jańaózende jol apatynan zardap shekken 2 adam qazir qalalyq aýrýhanasynyń jansaqtaý bóliminde aýyr jaǵdaıda jatyr, dep habarlaıdy Qazaqparat tilshisi.
Jańaózen qalalyq aýrýhanasynyń málimetinshe, 9 adam aýrýhanaǵa jetkizilgen. Onyń 5-ýi - bala.
«2 adam aýyr halde jansaqtaý bóliminde jatyr, al 5 adam travmatologııa bóliminde. Olardyń jaǵdaıy qalypty. 2 bala medıtsınalyq kómek kórsetilgennen keıin úıine qaıtaryldy», - deıdi aýrýhana basshylyǵy.
Eske sala keteıik, jol apaty 10 maýsymda keshki saǵat 20.00-der shamasynda bolǵan. Kýágerlerdiń aıtýynsha, Lexus ES 330 jeńil avtokóligi qarsy baǵytqa shyqpaqshy bolyp, Toyota Avalon kóligine soqtyǵysqan. Sonyń saldarynan Toyota Avalon kóligi tolyqtaı janyp ketti.
Mańǵystaý oblystyq ІІD baspasóz qyzmetiniń habarlaýynsha, bul oqıǵa QR QK-niń 345-baby 1-tarmaǵy boıynsha Jańaózen qalalyq ІІB sotqa deıingi tergeýdiń biryńǵaı tizilimine tirkelgen. Qazir tergeý amaldary júrgizilýde. Qajetti saraptamalar taǵaıyndalǵan.
