Jańaózendegi jol apaty: 10 jasar qyz aıaǵynan aıyryldy
AQTAÝ. QazAqparat - Jańaózenge jaqyn jerde bolǵan jol apatynan zardap shekken balalar aýyr halde. Bul týraly óńirlik kommýnıkatsııalar qyzmetiniń brıfınginde oblystyq balalar aýrýhanasynyń bas dárigeri Kámshat Tursynbekova aıtty, dep habarlaıdy «QazAqparat» HAA tilshisi.
«Oblystyq balalar aýrýhanasynyń jansaqtaý bóliminde alty jasar ul men 10 jasar qyz jasandy tynys alý qurylǵysynda jatyr. Balalar travmatıkalyq shok alǵan. Qyzdyń eki aıaǵyna ampýtatsııa jasaldy, bas súıek-mıy zaqymdanǵan jáne kóptegen jaraqattary bar. Uldyń da bas súıek-mıy zaqymdanyp, ishi jáne kóptegen dene músheleri jaraqattanǵan», - dedi Kámshat Tursynbekova.
Budan bólek, ol balalardy Astanadan kelgen travmatolog-ortoped dárigerdiń teksergenin atap ótti.
Mańǵystaý oblystyq densaýlyq saqtaý basqarmasy basshysynyń mindetin atqarýshy Klara Oralbaevanyń aıtýynsha, úsh zardap shegýshi Aqtaýdaǵy medıtsınalyq mekemelerge jatqyzylǵan. Jańaózen qalalyq aýrýhanasynyń jansaqtaý bóliminde alty adam jatyr. Olardyń jaǵdaıy turaqty aýyr dep baǵalanýda. Qalǵan 18 adam travmatologııa bóliminde em alýda. Olardyń jaǵdaıy - ortasha aýyr.
Budan buryn habarlanǵandaı , 25 qarashada 14 saǵat 20 mınýtta Mańǵystaý jol bóliminiń Ózen-Bolashaq temirjol ótkelinde «Gazel» markaly marshrýttyq avtomobıl teplovozben soqtyǵysqan. Ótkeldik sıgnal berý jabdyǵy durys istep turǵan. Teplovoz mashınısi 60 km/saǵ jyldamdyqpen kele jatyp, joldaǵy avtomobıldi kórgennen keıin shuǵyl toqtaıdy. Alaıda, soqtyǵysýdyń aldyn alý múmkin bolmaǵan.
