Jańaózendegi jarylys: gaz qubyryndaǵy aqaý kórsetilgen beınejazbaǵa TJD túsinik berdi
19 sáýirde áleýmettik jelilerde 17 sáýir kúni jarylys bolǵan Jańaózendegi turǵyn úı aýmaǵyndaǵy jerasty gaz qubyryn mamandar jáne ekspertterdiń qaraýy kezinde túsirilgen gazdyń shyǵýyn aıǵaqtaıtyn beınejazba taraǵan. Mańǵystaý oblystyq Tótenshe jaǵdaılar departamenti bul vıdeonyń jarylystyń dáleli bolyp tanylmaıtynyn málimdedi.
«Nazarlaryńyzǵa salamyz, kórsetilgen beınerolıkter jarylystyń dáleli bolyp tanylmaıdy. Qazirgi tańda júrgizilip jatqan jarylys-tehnıkalyq saraptama birneshe kezeńnen turady, kórý arqyly baqylaý, tereńirek jáne egjeı-tegjeıli zertteý úshin jaǵdaıdy baǵalaý qajet. Sonymen qatar qandaı da bir jalǵan aqparattardy jarııa etetin bolsa, QR Qylmystyq kodeksiniń 274-baby boıynsha qylmystyq jaýapkershilikke tartylatyndyǵyn eskertedi» delingen baspasóz málimetinde.
Sondaı-aq Mańǵystaý oblystyq Tótenshe jaǵdaılar departamenti azamattardan tek resmı aqparat kózderine senýin suraǵan.
Aıta ketsek, 17 sáýirde Jańaózen qalasynyń 2-móltek aýdanyndaǵy 2 qabatty úıde jarylys bolyp, 13 adam zardap shekken edi.
Sondaı-aq jarylystyń aldyn ala boljaldy sebepteri belgili bolǵanyn jazǵan edik.