Jańaózendegi jarylǵan úıde neshe adam bolǵany belgisiz - mınıstrlik

ASTANA. QazAqparat – Jańaózendegi jarylys bolǵan úıdiń tolyǵymen qıraǵan podezinde neshe adam bolǵany ázirge belgisiz. Tótenshe jaǵdaılar mınıstrligi órtke qarsy qyzmet komıtetiniń tóraǵasy Nurbolat Derbisov ortalyq kommýnıkatsııalar qyzmetinde ótken brıfıngide osyndaı málimet aıtty, dep habarlaıdy QazAqparat tilshisi.

«Jańaózende jarylystan turǵyn úıdiń bir podezi tolyǵymen qıraǵany aıtyldy. Turǵyndardyń aıtýynsha, ol podezde 30 shaqty adam bolǵan. Al siz sanamalap ótken resmı aqparat boıynsha, 14-15 adamnyń ǵana esebi shyǵyp tur. Qalǵan adamdar qaıda?» dep surady BAQ ókili.

Tótenshe jaǵdaılar mınıstrliginiń ókili apat bolǵan úıdiń turǵyndary áli túgendelip jatqanyn aıtty.

«Jergilikti atqarý organdary boıynsha biz qazir búkil esepke alý jumysyn júrgizip jatyrmyz. Birinshi kezekte ol jerdegi adamdardy qutqarý boıynsha tikeleı jumys jasadyq. Bizge kelip túsip jatqan málimet boıynsha 14 adam bar. Al turǵylyqty mekenjaıda neshe adam tirkelgenin, qansha adam naqty turǵanyn anyqtap jatyrmyz. Sony eseptep bolǵannan keıin qosymsha málimet beremiz. Al qazirgi tańda áli de qutqarýshylar jumys istep jatyr. Úıindiniń astynan taǵy basqa adam tabylyp jatsa, qosymsha habarlaımyz. Tazalaý jáne anyqtaý jumysy áli júrip jatyr», - dedi Nurbolat Derbisov.

Aıta keteıik, buǵan deıin Jańaózendegi apat kezinde qaza bolǵandar sany 4 adamǵa jetkenin jazǵan edik.

Keıin oblys prokýratýrasy Jańaózendegi jarylystyń sebebin aıtty.