Jańaózendegi tártipsizdikter barysyndaǵy shyǵyn 1, 9 mıllıard teńgeni quraıdy

Bul týraly búgin Úkimet otyrysynda Aqtaýdan tikeleı beınebaılanysqa shyqqan QR Premer-Mınıstriniń birinshi orynbasary Ómirzaq Shókeev málim etti.

Tártipsizdikter barysynda 41 nysannyń, onyń ishinde ákimdikterdiń 5 ǵımaraty zardap shekkenin atap ótken ol: «Bizdiń aldyn-ala esepteýimiz boıynsha, olardy qalpyna keltirý úshin shamamen 770 mln. teńge qajet», dedi. Ó.Shókeevtiń atap ótýinshe, «Qazmunaıgaz BÓ» AQ-nyń 3 ǵımaraty búlingen. Qalpyna keltirý úshin 1 mlrd teńgeden astam qarjyny qajet etedi. Al 29 kommertsııalyq nysan men bank ǵımarattaryn jóndeýge 250 mln teńge, 2 turǵyn úıge 3 mln teńgeden astam qarjy qajet. «Tolyqtaı alǵanda, bizdiń aldyn-ala esepteýimizge sáıkes, atalǵan nysandardyń shyǵyn kólemi 1, 9 mlrd teńgeni quraıdy», dedi ol.

Bir aptanyń ishinde eksporttyq jobalaý qurylys uıymdary atalǵan nysandardy jóndeý jumystaryn bastaıtyndyǵyn atap ótken Ó.Shókeev: «Rezervten qarjy bólý týraly Qaýlyny kútpeı kompanııalar, merdigerler óz qarajattary esebinen qalpyna keltirý jumystaryn bastaıdy. Sáıkesinshe, tapsyrma Úkimettik komıssııa tarapynan berildi. Jobalaý kompanııalarynyń esepteý qorytyndysy boıynsha biz bıýdjetten bólinetin qajetti qarjyny anyqtaı alamyz», dedi.